日本萬人迷木村拓哉同女星小雪合演嘅新劇《Engine》雖然啱啱開拍冇耐，但就已經傳出唔少是非，據現場嘅工作人員爆料，原來木村同小雪相處有唔少火藥味。
木村拓哉同小雪喺五年前曾合演過日劇《BeautifulLife》，當時小雪重係新丁，但今時唔同往日，同湯告魯斯合演過電影《最後武士》嘅小雪成功晉身為國際女星，態度就唔同晒，但偏偏木村對輩份關係、守時等原則非常嚴謹，過去佢就試過同內山理名、井川遙等合作嘅女星傳不和。
今次木村遇上小雪，令工作人員擔心以後嘅日子唔好過。而喺早前劇集所舉行嘅記者會上，木村所屬嘅尊尼事務所訂明唔准小雪埋身，以免暴露二人身高嘅差距。喺記者會結束後，小雪想行埋木村身邊打招呼，木村見狀即時黑面行開，事後大鬧小雪唔守規矩，小雪得知後當晚重食唔落飯。
另外，荷李活男星李察基爾（RichardGere）日前到日本宣傳電影《談情共舞》，並為下星期一播出嘅節目《SMAPxSMAP》內煮食環節擔任嘉賓。當日，SMAP為李察炮製咗「海膽鰻魚豆腐料理」，令李察大叫「Unbelievable！」。