大食Jack的藝術家老友，有筋肉創作人之稱的大隻S，最近搞展覽，花咗唔少心血，在此希望佢展出成功。唔知係咪受BTdownload或翻版影響，本地班StreetArtist呢兩年突然冇晒聲氣，謹希望大隻S幫香港創作界重振聲威喇。
下午茶時間，接到燈頭榮電話，原來佢喺新界區鐵路沿線間百貨公司租咗個檔位，賣日本潮流嘢，聽講生意唔錯。燈頭榮：「可惜好景不常，聽講百貨公司租約期滿，商場大業主已放口風，租就一定加，但未決定加幾多。相信肯定唔少，因為聽講百貨公司收風後都唔想續租，寧願搵第二個地方由頭嚟過，咁你估到加租幅度如何喇？老實講，呢度生意一向唔錯，全因區內人流夠，所以租金一向已高過區內其他地方。不過呢區並冇因為自由行或今年經濟復甦而生意做多咗，點知今年就藉口經濟復甦，大業主拚命加租，租客睇得通自然唔肯陪跑。𠵱家我檔嘢重未知去向，要睇百貨公司個日本老闆點睇喇！其實有時做生意切忌高調，被業主知道生意好，就肉隨砧板上。最好做低調富豪，好似走原宿水貨個袁仁祥，一個禮拜搵七萬，發咗冇人知，轉頭重可以扮慘求業主減租㖭。」
主持人：大食Jack
八卦熱報：[email protected]