利嘉兒、吳日言同男子組合Bliss噚日喺沙田宣傳護膚品，利嘉兒先前抱怨男友周國豐迫婚，但佢噚日一提起周國豐就即刻眼濕濕，佢話：「早排我生日，我啲朋友都以為佢會喺當日向我求婚，而我亦有晒心理準備，雖然最後係冇，但佢就送咗三份有鋪排過嘅禮物畀我。」
利嘉兒重話就係呢三份禮物，只要周國豐肯開口，佢就二話不說嫁畀佢。問利嘉兒係乜嘢禮物咁厲害，佢話：「有兩樣係唔講得，另外一樣係張喺日本買嘅ＢＢ被，總之呢三份禮物比求婚戒指重有意義。」未結婚就先送BB被，周國豐果然厲害。
而周國豐噚日就喺電話度話：「聽到佢咁講都開心嘅，三份禮物都係平時行街佢見到鍾意，全部都係實用嘅，戒指就未送。」問周國豐會唔會準備求婚，佢話：「其實大家一直有共識，我心理都準備好。」似乎呢一對都好事近喎，馮仁昭都戥佢哋開心！
色士風樂手KennyG同台灣歌手王力宏，喺唱片公司拉攏下，將會攜手合作。KennyG會邀請王力宏一齊合作新歌《愛情協奏曲》。而王力宏同KennyG都係對音樂好有要求嘅音樂人，相信佢哋嘅fans聽到呢個消息都會好開心。
許冠文將喺紅館搞棟篤笑，噚日佢接受商台訪問時話唔擔心賣飛成績。講到棟篤笑內容，佢話：「本來有八成講董建華，以前個個都話佢，成為一個出氣袋，但𠵱家唔知點，同埋我都會講吓一男一女拍拖，好似係唔可以改變對方，但我就研究到一個秘方可以，呢樣係我做緊嘅臨床實驗。」
張學友忙於準備舞台劇《雪狼湖》，搞手之一陳淑芬噚日話希望啱啱生完BB嘅學友太太羅美薇到時嚟後台，替大家打氣。陳淑芬又話：「到時唔少日本、加拿大同星馬嘅歌迷都會嚟欣賞，佢哋除咗會有場刊外，重包埋學友簽名劇照同一條絲巾。」
陳啟泰擔任亞視新遊戲節目嘅主持，噚日佢就帶同三位美少女一齊去海洋公園宣傳，豔福無邊。陳啟泰話：「今次主持呢個gameshow真係好開心，唔係假，第一集就有個浙江旅客攞咗十幾萬走，真係見到都開心。」
陳鍵鋒同符思思噚日喺西貢拍攝無綫新節目《百法百眾》嘅外景。陳鍵鋒話第一次着禮服，但佢形容自己似侍應多過新郎，陳鍵鋒話：「拍時裝劇未試過着禮服，反而古裝拍結婚就試過，不過今日我覺得個造型似侍應多啲。」
馬清偉噚日出席東華三院新一屆董事局就職典禮，佢話好享受同仔女一齊嘅日子，每逢周末長假就會陪仔女，遲啲暑假重會同前妻薛芷倫一家人出外旅行。問佢會唔會同薛芷倫復合？馬清偉笑笑口話：「世事難講。」佢重話唔反對前妻夜蒲：「佢有自由嘛，都係周末先去玩啫。」
