唔經唔覺董建華已辭官半個多月，雖然未致人間蒸發，但係佢嘅新聞真係愈來愈少。人走茶涼，中國官場慣見平常，朱鎔基係咁，江澤民如是，老董都冇得變，要學吓由絢爛復歸平淡喇。
八方問佢嘅舊部有冇同前老細聯絡，佢哋話通電話就有，董生已經由上海返港，陳婉嫻都話行山時撞到佢；佢哋話老董身體仍然欠佳，喺上海時都有不適，至於對腳，都唔可以企得太耐。
世事好奇怪，老董真係走咗，大家開始懷念佢，覺得佢雖然固執，但係心哋算好，唔會害人；就算俾阿爺明升上神枱奪權，重係好落力為香港人爭取利益；即如佢最後一次上京，仍然日日喺北京見京官，又見薄熙來又見馬凱，重向周小川要求進一步放寬人民幣業務限制。如果畀着第二個，反正都要走人，重同你理？唔一槌打爛道門都偷笑。
當然，特區政府重有專人招呼呢位前特首，例如佢一落台，掛喺屋企支區旗即刻俾人拆走，保鑣由兩個減到一個。至於特首辦亦有小變動，事關老細唔見咗，煲呔曾身邊又有自己嘅新聞秘書陳羿，為免浪費人手，麥國華已經暫時調回新聞處總部，而劉兆佳同陳建平就如常上班，大家都係等候新特首發落。
傳真︰2623-9278
電郵︰[email protected]