是日恒指高低波幅121點，埋單跌25點，受滙控（005）與中移動（941）所累。兩隻最重磅成份股，令恒指報銷31點。
電盈C輪：電盈（008）派完成績表後，前日升0.25元，昨日再進帳0.15元，高收4.525元。電盈好樣，C輪生猛，最巴閉嘅係4664，急升57%，收11.8仙。4664喺6月初到期，溢價10.5%，槓桿率38.4倍（有效11.6倍），引伸波幅36.3%。正股派息9.6仙，相等於股價2.1%，計埋股息因素，4664溢價唔低。
如果認為電盈重有得去，搵C輪炒，3956比較實際。隻輪年底到期，輪價76仙，溢價2.5%，槓桿率6倍（有效4.6倍），引伸波幅28.1%，爆炸力係弱啲，但勝在壽命長，溢價低，唔怕溢價縮水。
中石油C輪：隔晚紐約期油再升1.41美元，中石油（857）升0.15元，收5蚊齊頭。C輪3517與4606，分別彈升37%與45%，都係低溢價或負溢價、槓桿率唔細嘅C輪。
高價追中石油C輪，有風險。要買，最好等正股回吐嗰陣，3968啱睇。隻輪9月尾到期，輪價25.5仙，溢價3.1%，槓桿率19.7倍（有效9.6倍），引伸波幅21.9%。
太AC輪：太A（019）企定喺61.75元，吼住回落到60元邊邊，搵C輪博反彈，可揀對象唔多，3528係正路之選，呢隻最易買賣，11月尾夠鐘，輪價31.5仙，溢價6.9%，槓桿率19.6倍（有效9倍）引伸波幅20.5%。
聯想C輪：聯想（992）新聞多多，早前升後，昨日跌7.5仙。聯想冇P輪，C輪有3件6-7月到期，溢價9.2%以上，冇隻買得過。
章盛