港台再次有人涉案，俾法官批評，港台啲敵人、仇人、眼紅人乘機出嚟踩多幾句，鬧港台鬧到不亦樂乎。既然港台每星期五日黃昏時間有個兩小時三十分嘅節目叫做《自由風自由Phone》，逢星期三跑夜馬就只得一小時，主持人經常好似講到到喉唔到肺，不如索性大方啲，讓出呢個時段畀徐四民之流做節目主持，等佢哋在節目鬧港台鬧到夠喉，一來以示言論自由，二來等一啲老人自暴其醜，何樂而不為？
碰到議員Ｃ，以為佢會搭順風車鬧港台幾句，點知佢話：「我熟晒五台山運作，做節目下下要tender（招標），邊有得做呀？節目質素全由導演、監製負責，靠個人主觀判斷，作品出嚟之後，如果係垃圾，人人都可以鬧，但製作節目過程中，要由導演、監製話事。譬如買二十個彩色氣球做布景，你要三家tender，價錢最低者，可能唔合眼緣，與劇情需要不符，唔通夾硬要咩，但如果監製要買價錢最貴嗰批，佢可能坐監噃，點搞呀？」議員Ｃ甚有製作經驗，以前佢負責嘅節目，經常有豪華布景畀觀眾睇，換在今天，恐怕廉記人員要入廠侍候。
監製Ｔ貴為公僕，份工打風都打唔甩，一於縮埋等退休。佢話港台現時雷電交加，做事好有風險，唔做唔錯，一於抱住公僕金句做人——「程序為本，目標為次」，左丁山同佢加多一句：「辦事第三，可避則避。」公僕程序中，懶，唔係罪過，最多唔升級啫；勇於辦事，一下唔小心踩錯腳，到赤柱踎監都有份。監製Ｔ話：「現時所有公僕都士氣低迷，依足本子辦事，多啲咪搞，最好參加公務員培訓班，去上堂聽書有人工攞，聽岑逸飛講書，勝過返工多多聲啦！」岑逸飛專講古書（如鬼谷子、孫臏兵法……）與現代管理如何結合，廣受歡迎，到政府機構及大公司演講收銀，唔知幾過癮，過癮在唔使參加tender，因為市場上冇人同佢爭也。