自從粉嶺牽晴間樓價喺一個月內勁升兩成，區內二手市場即時吸引一班投資客注意。喺牽晴間附近，樓價相對落後嘅屋苑，近排成為投資者熱門炒賣嘅對象。
中記莫文業話，啱啱就有六個朋友關係嘅投資客，每人大約夾咗二百萬，連掃花都廣場十個單位，涉資一千一百萬。呢個投資組合，所掃入嘅單位，全部五百零呎，集中喺中、低層，平均呎價二千一，比市價低六、七個巴仙。
佢哋預計，呢批貨揸一年轉手，樓價有兩成升幅，即係共賺二百二十萬，每人分番三十零萬。同時，其間將單位出租，租金收入就當補貼手續費，計落幾吸引。
花都廣場因為投資客激增，三月份錄得五十六宗成交，係二月份嘅四倍幾，平均呎價升咗七個巴仙。區內地產代理預計，花都廣場樓價仍然落後，短期內重有一成左右升幅。
荃灣麗城花園海景銀主盤，一放售就有逾十個客爭購，最終高出叫價一成賣出。
中記劉炳鏘話，優質銀主盤罕有，市場反應熱烈，銀主仿效招標，接受洽購，最終由區內換樓客，以二百一十四萬奪得。呢個二期四座高層D，七百九十呎，每呎二千七百幾，貼近市價。
銀主盤造價一向偏低，今次開價一百九十六萬，原本諗住到價就賣，點知反應咁踴躍，銀主多袋十八萬。
自從中記美記紛紛過濠江設據點後，當地樓宇買賣資訊透明度高咗好多，但集中住宅，商舖、商廈交投相對較少。
蘭西剛收到中記澳門成交資料，發現著名食街官也街有個地舖易手，九號D舖，逾千呎，成交價四百九十五萬，每呎四千七。官也街係近年新興，遊客食嘢與買手信熱點。
電郵地址：[email protected]