無天理啊！有病的狗還要工作，「狗士多」老闆娘Corra喪盡天良？
非也，非也，原來Corra的四頭愛犬天生愛玩，與「狗公關」妹豬走在一起便玩過不停，仿似過度活躍兒童，返工等於奉旨玩，夫復何求！
當然，大家不能忽略牠們本身獨特的性格引申出來的獨特的病。究竟牠們有乜病呢？
記者：邵超
攝影：林栢鈞
鳴謝：www.doggie-store.com
妹豬、Happy、Snoopy、Popeye和CoCo於「狗士多」工作，正確來說，妹豬是全職員工，其餘四頭狗僅屬兼職性質，假日不定期輪流到店裏逢場作興。牠們所患的病，全是都市病，奇就奇在看到牠們的病徵，就會令人樂開懷?!你說搞怪不搞怪！
Happy：走鬼老狗癡呆症
古語有云「勤有功、戲無益」，對於這個搞怪家庭的孩子們來說，剛剛相反，愈玩愈贏得客人的歡心，嗲到連Corra都被五條化骨龍的搞怪舉動融化了。「日日都要抽一個小時跟牠們相處。本身最緊張Happy，因為養咗佢11年，以前住公屋成日要『走鬼』，最高紀錄一個月走三次，每次佢都要寄人籬下，覺得好唔開心，終於決定搬屋。」
「走鬼」次數多了，Happy每次見媽咪拿着大行李準備出門，就扮跛博可憐，弄得Corra心驚膽戰。不過「狼來了」的教訓，就是Corra反過來指住Happy嘲笑呢！「近排發現佢愈嚟愈無記性，有時無端端會在廁所瞓着，醫生話佢有少少『老狗癡呆症』！」雖說患老狗癡呆症是不幸事，但經常不小心「吃錯」CoCo的狗糧，病情應該很輕微！
搞怪家庭絕技公開
Happy
性別：男
年齡：11歲
品種：西施犬
性格：鍾意黐人，細膽，錫身
病名：老狗癡呆症
冧客招數：友善，主動跟客打招呼，肯畀人抱
Snoopy
性別：女
年齡：5歲
品種：北京犬
性格：怕事但裝腔作勢，鍾意黐人
病名：精神分裂症
冧客招數：無，鍾意吠人，唔合格
Popeye
性別：男
年齡：不詳
品種：北京犬
性格：乸型，勁嗲，對陌生人有少少戒心
病名：女性化
冧客招數：美食當前，保持「Stay」動作好耐
CoCo
性別：女
年齡：1歲
品種：金毛尋回犬
性格：頑皮，百厭，活躍，破壞王
病名：認知困難
冧客招數：鍾意黐人
妹豬
性別：男
年齡：10個月
品種：法國老虎
性格：鍾意黐人，勁嗲
病名：大食懶
冧客招數：勁嗲但經常睡覺吞Pop
Snoopy：最高尚宮愛做貓
歲月雖然不饒人，但老狗Happy身為老大，都會不時吠兩聲調停喪玩的弟弟、妹妹。「Snoopy就唔同，牠是屋企的大家姐，永遠唔參戰。佢當正自己係『最高尚宮』，鍾意坐在高處，吠其他狗，鬧佢哋玩得癲。每次見到佢哋嗲我，佢就會唔開心。」
「最高尚宮」平時聲大夾惡，有姿勢但無實際，重身患「精神分裂」㖭！「佢成日當自己係貓，非常有性格。有時我鬧佢，佢第二日就唔睬我，皆因貓最識發脾氣。當其他狗要做HandHand才有食物食時，她聰明到明知就算唔做，我都會照俾佢。有時佢食狗糧食到悶，就專登唔食嘢扮無胃口，呃啲鮮肉返嚟食。」如此聰明的狗，叫人又愛又恨。
CoCo：不願做大狗
大家姐罹患「精神分裂症」，想不到連細仔CoCo都如此，香港「人」壓力真係大！「佢明明係大狗，可能自細望住Happy佢哋，搞到以為自己係細狗，學晒佢哋鍾意撲上身。之前重試過推跌兩個客人，真係唔好意思。佢好鍾意同人玩，所以拖佢出街都幾尷尬。」如此的豔福，能消受的又有幾多人？
Popeye：握住手手瞓覺
不過自細看着她長大的大家姐，就不知多疼她。「Snoopy淨係鍾意鬧Popeye，因為睇唔順眼佢乸型，有時CoCo見到，都會仗義幫助Popeye趕走Snoopy。Popeye最蠢又最無膽，但係最叻嗲人，人客最鍾意佢。夜晚瞓覺時，佢一定跳上床，扮女仔挨喺我的臂彎裏，重要我握住佢隻手。真係俾佢笑死！」乸型對於女人來說最無殺傷力，永遠最能騙得最大甜頭，其實Popeye是聰明仔吧！
