市況淡靜冇方向，大家愈炒愈冇厘頭，好似日前慧峯（8228）話搞電力，股價升幅以倍計，連帶一大串創業板股都鹹魚翻生，噚日升幅最勁的14隻股票，竟然全部都係創業板股，升幅重係20％以上，認真係奇景。
小初就冇撲落場去炒作，皆因創業板股向來成交都唔多，炒家一旦離場就隨時被困，所以都係隔岸觀火穩陣啲。
另外，經紀黃日前推介的天虹紡織（2678），剛公布去年全年業績，股東應佔溢利有成1.37億元人民幣，比起去年上升61.1%，雖然今年冇息派，但聽講明年會有得派。
經紀黃話，有人見過天虹管理層，公司早排租多幾個廠房，加上先前一路投資，估計05年紗布產能會大增。
相對其他紡織股PE多以雙位數字計，天虹現價往績PE唔夠7倍，夠晒平。
天虹噚日冇起跌，收1.25元，成交股數104萬股，金額130萬元，但成交細始終會影響投資者意欲，希望公司可以搞多啲推廣活動，令成交轉趨活躍。
慕容小初