荷李活女星珊迪娜布洛（SandraBullock）闊別銀幕五年，再次喺新片《選美俏卧底2：姿整任務》度做精靈女卧底，佢今次為咗查案唔止扮成阿婆混入老人院，重要混入人妖比賽，佢話雖然拍攝過程辛苦到「甩轆」，但又好鬼好玩。
珊迪娜布洛扮演嘅FBI聯邦密探姬絲，喺上集混入美國小姐選美大會做卧底，成功解除恐怖襲擊事件後，一夜間成為全城矚目嘅大明星，重出埋自傳上電視。不過嚟到今集佢嘅景況就唔係咁掂，男友同佢分手之餘，重日日被狗仔隊偷拍，搞到佢做唔到卧底，被迫做「聯邦調查局之花」專搞公關形象。
不過，當姬絲知道出爐美國小姐老友同電視主持人喺拉斯維加斯俾人綁架後，決定重操故業，同勁姣嘅大隻佬形象設計着到好騎呢混入人妖比賽，又為查案而扮成阿婆到老人院，造型維妙維肖。
珊迪娜布洛喺片中亦會着上好多靚衫，早排佢喺美國接受傳媒訪問時，被問到現實生活中會唔會好似片中女主角一樣經常有形象顧問指導，佢話：「我都會面對好多所謂衣着專家教我着衫，佢哋會同你講點着先會令大眾覺得好睇，但有時亦會出現反效果，因為有啲專家只係用你嚟反映佢哋自己嘅品味啫。」