一部《基本法》，由於先天不足，錯漏百出，愈解釋，愈捉蟲，二五之爭，節外生枝，一人一句，搞到愈講愈胡塗，案中有案。
大陸「法律專家」王振民突然挑起新爭論，話曾爵士即使做埋嗰兩年，跟住再「選」，頂攏最多只可以做七年，因為《基本法》訂明，特首只准連任一次！
王振民呢亭「專家」，真係唔知讀咩嘢法律？嗰頭話曾蔭權接任廢董，「新的特首」並非「新一屆特首」，咁既然做兩年，不成「一屆」，曾蔭權理所當然，連任一次，即是由二○一二年嗰一屆計，即是頭尾共做十二年！
只不過因為土共不滿，中方要「安撫」，於是又將煲呔據法理可以享受嘅十二年任期，監生踩為七年，唔通土共嘅怨氣，就等於法律？土共發牢騷噴幾噴，兼「四大惡人」留京拒絕回香港開會表示支持，咁就可以「呼」一聲，將五年一風吹走？
咁嘅「法治」，十足兒戲，堂堂一個大國，點樣「以法治國」？今日五年，聽日兩年，後日十二年，大後日又變咗七年！何鴻燊以長老身份，鐵定煲呔可以做十二年，王振民嗰頭就話只准七年，跟住曾憲梓之流又話十二年，咁嘅「以法治國」，七嘴八舌，十足玩泥沙，煲呔未上台，經已俾一班咁嘅二打六玩殘！
好嘞，釋法又婆婆媽媽，兩年定五年，滿天神佛，愈噏愈煩亂，靠呢部《基本法》，可以「長治久安」？發夢啩？
傳真︰2623-9278
電郵︰[email protected]