大市一如預期反彈，除中段恒指曾衝上13556，上升逾130點外，大部份時間，反彈力度未算強，臨近尾市時，期指表現更弱。恒指收13516，升91點，期指收13420，僅上升20點，低水又擴大到96點。今日大市若未能持續反彈而守穩在13500之上，唔排除會先尋底，測試13320支持．
噚日上升股有近400隻（不計認股證），10大上升股中，有8隻係創業板股份，自「慧峰（8228）事件」後，市場又再出現尋寶熱潮，10大中排首位的金屬電子交易所（8161），升幅就達330%，第2係慧峰，第3同第4係滙盛（8108）同藍帆科技（8166），升幅分別係46.6%同45.4%。
慧峰夥拍中國電力集團進軍本港市場，兩日之內，股價由0.148元飆升到最高1.18元，收0.99元，升幅568%！噚日成交更達3.75億股，係發行股數4.95億股的75%，扣除大股東持有的3.04億股，街外流通股票幾乎全部轉手兩次。
慧峰效應之下，唔少有「殼股」概念嘅股份又蠢蠢欲動，有大成交配合嘅就有華脈無線通信（499），最高搶到上11.1仙，收10.6仙，大升23.2%，成交更大增到接近8000萬股。今年1月初，華脈在短短3日內，由6仙急升上14.4仙，升幅140%，今次由8仙起步，有機會歷史重演。
聽市場消息，有大公司睇中華脈，可能會「㗳」咗佢。華脈家下市值只係3億幾元，主要係物業收租同電信服務，以呢種「晒士」同咁「單純」嘅業務而言，正係殼股嘅好材料。今年年初的急升，可能係走漏風聲，之後有心人㩒番低到8仙水平，再數集成兩個多月，今次再上，看來時機已成熟，應該係「真波」了。
長和派成績表，基本上比市場預期為佳。長實（001）去年賺123.8億元，升42%，每股盈利5.35元，市場預期盈利係104億元至142億元。和黃（013）賺161.3億元，升38%，每股盈利3.78元，市場預期盈利係150億元至161億元。長實收69.25元，升0.75元，往績PE12.9倍，中線可看好，目標價85元。
郭兆誠