今日四月一號，亦即係愚人節，但估唔到未到呢日，阿塞拜疆國家隊嘅巴西籍教練阿爾拔圖就被人整鑊金，無端白事鬧英格蘭前鋒奧雲係侏儒，搞到佢𤓓爆。
奧雲早排接受訪問時話，之前試過喺一場比賽入四球，但唔記得有冇入過五球；點知阿爾拔圖聽到嘅版本，就係奧雲話要入佢哋五球。結果場波英格蘭贏二比○，奧雲冇波入，於是阿爾拔圖亦即時「嚟料」，狂插奧雲啲波水皮，兼且串到玩人身攻擊。佢咁話：「嗰個侏儒係乜水？佢贏過啲乜嘢？」
事後奧雲澄清自己冇講過，而英格蘭領隊艾歷臣同隊長碧咸，都認為係阿爾拔圖誤解咗奧雲嘅意思。
奧雲向來好低調，而且又係英格蘭國家隊副隊長，所以邊句講得邊句唔講得，相信佢好清楚。所謂「以訛傳訛」，下次阿爾拔圖喺插人之前，先求證一下，咪再攞架嚟丟。
德世盃要防自己友
德國足總正式就上周六友賽斯洛文尼亞時，有數十名該國球迷搞事，作出道歉，並承諾會檢討保安問題，認真計劃世界盃決賽時，阻止球場暴力。除九六年英格蘭歐國盃決賽周外，之後嘅大型國際賽，主辦單位重視如何防止其他國家球迷搞事，甚少好似德國咁要防自己人，認真羞家。
范將軍閘前有火
曾效力傑志嘅前中國國腳范志毅，日前俾上海一的士司機投訴佢毆打。呢位素有「范大將軍」之稱嘅球員因對方唔讓路，紅綠燈前停低車打開對方車門就抦。佢老兄成三十五歲人都咁好火，唔知係咪中超就嚟開波，佢效力嘅升班馬上海中邦實力又麻麻，緊張到荷爾蒙失調呢？
威廉絲姊妹讚花香
實況電視劇喺美國好流行，最近連美國網壇黑珍珠威廉絲姊妹都分一杯羹。美國ABC電視台為佢哋拍咗個實況節目，有六集咁多，等觀眾知道佢哋兩姊妹平日喺網球以外嘅生活係點樣。作為妹妹嘅莎蓮娜重賣花讚花香咁話：「我同家姐嘅生活多姿多采，相信人人都話好睇。」
河昇鎮食白果莫氣餒
亞洲男籃不嬲都係中國同南韓之爭，估唔到𠵱家重鬥到入NBA㖭！噚日火箭作客拓荒者時，就上演咗一場中、韓大戰：身高七呎六吋嘅姚明，撼身高七呎三吋嘅「韓國小巨人」河昇鎮。睇經驗同實力，就知入咗二十九分嘅姚明玩晒，而「阿昇」就食白果，睇嚟佢有排學。