韓劇《大長今》全城熱爆，商台《韓流襲港》主持劉偉恒都食住呢股長今熱，透過韓迷網站KoreanStorm.com搞咗一連串嘅長今投票活動，好似最近「最討厭角色」選舉，最乞人憎嗰個竟然唔係奸到出汁嘅崔尚宮、今英或者崔判述，而係同長今一齊細細個入宮嘅令路，結果都幾出人意料。
李玲詩飾演嘅令路，以百分之五十四嘅票數排行「最討厭角色」之首，洪莉娜飾演嘅今英排第二，崔尚宮嘅哥哥、亦即係李熙道飾演嘅崔判述排第三，至於甄美莉飾演嘅崔尚宮，就只係排第四。
馮仁昭估計，觀眾對崔尚宮生於權貴之家、迫於無奈做壞事都會寄予幾分同情；但令路就真係由細到大都蝦長今，加上佢成日嘴藐藐兼眼超超嘅嘴臉，又難怪成為最乞人憎嗰個！
梁漢文噚日喺商台接受訪問，最近佢開始籌備新碟，見佢噚日個樣都好鬼攰，佢話今次隻碟搵咗a17幫手做音樂，遲啲佢重會同楊千嬅去雲頂登台，聽講雲頂好猛鬼，問佢驚唔驚？梁漢文就話：「我自己就重未遇過，好好彩，而我每次出門，屋企人都會幫我求定平安符。」
嘉碧儀噚日出席喺金鐘舉行嘅Predige護膚品新聞發布會，佢好識做咁話自己一向都崇尚自然，所以好開心可以做呢隻天然產品嘅代言人，噚日見佢fit咗皮膚又靚咗，佢就公開秘訣話:「我年頭開始已經戒食肉，多食豆腐蔬菜，對腸胃都好啲，而且我一向好鍾意小動物，想戒食肉好耐㗎啦。」
鄭少秋噚日去新城接受訪問，講起佢嘅演唱會，佢話嘉賓方面只差汪明荃未覆個期。記者問佢會唔會好似小春咁勁歌熱舞，秋官就好搞笑咁話：「佢邊勁啫？我有睇佢演唱會，佢哋三個風火海跳舞，得其他嗰兩個跳。小春唱《啼笑姻緣》又慳力到死，只係郁吓把扇。」
廖碧兒係便服鞋Footspot嘅代言人，佢日前拍攝咗一輯硬照，展示最新款式嘅便服鞋。廖碧兒話：「我好開心可以再做佢哋嘅代言人，佢哋嘅鞋好啱我着，而且我平時會出席唔同場合，有佢哋嘅贊助真係好方便。」
顏福偉噚日往中環接受新城訪問，佢早前邀請奧運金牌得主彭勃拍廣告，問佢有冇問對方有關跳水隊嘅緋聞，顏福偉就笑住話：「我早排去北京同佢哋食飯，都有問過。」有指田亮既追求師妹吳敏霞又追陝西師妹，顏福偉就話：「我都同吳敏霞食過飯，佢真人靚過上鏡，畀我都揀吳敏霞啦。」
