建滔化工（148）前日公布業績，盈利增長好過分析員預期，但股價偏偏就連跌兩日，令小初百思不得其解。
經紀黃提醒小初，建滔噚日有一手1800萬股，每股造23.50元的大手上板，涉資4.23億元，小初先知道原來係大股東減持。
經紀黃話，唔排除之前有春江鴨收到風，所以在25元樓上沽貨先，反正稍後有貨補回。建滔噚日再跌4.7％，收23.30元，成交金額5.03億元。
經紀黃又話，大股東趁高價減持股份套現，其實係無可厚非，但難免會對投資者信心有影響。不過，思捷（330）大股東同董事減持，但股價愈升愈有，則反映始終係公司基本因素最重要。建滔基本因素冇變動，所以仍然揸得過。
另外，曾經話沾手澳門賭業但冇下文的易通控股（312），股價噚日又見異動，升31.7％，收0.162元，成交股數5400萬股，金額825.8萬元。
經紀陳話，易通今次又有新傳聞，就係發行大量新股收購大陸一檔手機分銷生意，變相賣殼，但堅唔堅就唔多清楚。
慕容小初