首富李嘉誠千億王國由誰人接棒，一向係市場焦點，誠哥噚日再被問到呢個問題時話：「我自己仍未攰，今朝早由九點開會，到𠵱家已經開咗五、六個會，我自己好enjoy做事。生意我唔敢講永遠，若真係要退出，我仍然會做事，基金會係終身嘅事，時間亦用咗唔少。」雖然講完都係唔知邊個接棒，但就係超人第一次講自己會退落嚟，唔知市場人士會唔會有乜揣測。
講開揣測，誠哥噚日講番合和主席胡應湘喺灣仔嘅項目MegaTower，話說年多前有傳媒報道，一名自稱誠哥契仔嘅人發起灣仔居民阻撓發展MegaTower。誠哥話自己一生人都冇契仔，公司負責嘅部門寫咗封信去雜誌澄清，已經登咗。誠哥重話，唔希望將自己寶貴嘅時間放喺反智、造謠者身上，當然，若損害佢名譽嘅，就唔係咁講啦。
有陣時，誠哥都識搞笑，噚日佢講開居住問題，話自己嘅居住面積，比長和系好多管理層更細，「我結婚時住house（獨立屋），到個仔結婚時，我就住apartment（分層住宅）。」八方記得誠哥無搬過屋，佢嘅意思應該係，因為多咗個人住啩。
傳真︰2623-9278
電郵︰[email protected]