董去曾來，大家成日話老董同煲呔做事方法好唔同，到底有幾唔同呢？舉個例，眾所周知老董做嘢慢幾拍，嗰啲官方委員會夠膽過咗任期都唔公布新任命，大家以為搵人入會好難啦，但煲呔曾過去幾日，竟然一口氣公布咗至少十個委員會嘅新任命同任期，單係噚日公布嘅已經有五個，包括再培訓局（由田北辰代譚耀宗做主席）、食物及環境衞生諮詢委員會、行政會議成員及立法會議員薪津獨立委員會、社區體育事務委員會、精英體育事務委員會，以及大型體育活動事務委員會嘅任命。
早幾日公布嘅有旅發局、體育學院、強積金諮詢委員會，同埋房委會嘅任命。雖則大部份主席人選冇變，係咁易換吓啲成員，但煲呔咁急將啲餅仔分出去，到底係想顯示自己做嘢比老董勤快，抑或趕住收買吓人心呢？
傳真︰2623-9278
電郵︰[email protected]