豪宅愈賣愈貴，發展商都好落力，提升物業質素，賣貴啲，都重可以話畀買家聽係值得嘅。
薄扶林貝沙灣南灣，即將推出嘅第五座，盈大地產營業及市務總監顏金施話，第五座係真正向南樓，喺剩番嘅座數中，唯一係一梯兩伙，又用埋雲石地台、浴室暖管，以至歐洲電器等等，連大堂都特別落本。
每一層嘅建築成本，加多咗一百萬，加碼總共用咗四千萬提升質素，比起其他座數高兩成。
發展商特別替第五座改名，叫做「MaisonBel-Air」貝沙大宅。
質素高咗，自不然反映喺價錢上，顏金施話，第一批單位，會喺今個月開賣，意向價每呎萬四蚊，入場費最少要成三千萬，首批推出嘅單位，數目唔會推多過四分一，下半年呎價預計要萬六蚊。
利嘉閣以一百五十萬易手？呢單料千真萬確，但唔係本港地產代理集團利嘉閣，而係澳門同名住宅樓盤其中一伙，聽落好易引起誤會。
蘭西係睇美記提供嘅澳門成交，發現呢宗買賣，單位為高層L，千二呎，成交價百五萬，每呎一千二百五。物業樓齡十六年，聽講由澳門細行促成。
上個禮拜，澳門二手成交活躍，較特別係南灣湖十號地段樓花，中層C，二千六百呎，成交價六百九十萬，每呎二千七。
華人置業高級銷售及租務經理柯靄邦，為咗推銷上水邁爾豪園，近期頻頻粉墨登場。噚日以一身拉丁情人造型出現，重有兩位八十年代打扮嘅外籍模特兒陪伴在側。
為咗配合復古主題，華置大劉劉鑾雄特別借出私人珍藏，八十年代嘅Panther古董車。柯靄邦話，今次嘅復古打扮，係為咗介紹物業嘅生活品味，享受生活嘅態度。
柯靄邦當然不忘介紹樓盤，噚日推介五房戶「邁豪居」，共三十一幢，面積三千四百呎。
邁爾豪園示範單位已經竣工，柯靄邦話，下星期會招待代理及銀行界參觀，並開始接受買家出價洽購，意向價維持每呎六千蚊，邁豪居嘅入場費，就大約千六萬。至於另外一款四房二千七百呎嘅爾典居，入場費千三萬至千四萬。
一名大學經濟教授，身體力行，不斷買賣物業，○三年沙士期間，買咗三個廣播道住宅，其後轉手，賺逾五百萬。最近，佢又再度出手，日前以五百一十萬，掃咗兩個廣播道雅麗園。
港置林逸明話，佢用二百一十七萬，連車位買入同區百樂園低層五百七十三方呎A四室。
聽講，買家多年嚟一直有投資物業，鍾情九龍塘、廣播道同畢架山一帶住宅，因為易租出，只要喺佢設定嘅範圍內就掃。𠵱家佢持有七個單位，另外，家人都有揸物業。唔知啲學生有冇佢嘅真傳呢！
大陸官方發起嘅首個香港房地產展覽會，八月二十七號起，喺北京中央商務區，中國國際貿易中心展覽大廳舉行，噚日專程由北京請嚟中國商務部外貿發展局代表，同傳媒、發展商講解吓個展覽。
點知，只有新鴻基地產、恒隆地產同恒基地產有派代表出席，場內反應唔算好熱烈。
香港籌辦單位解畫話，其實未有派出代表出席嘅太古地產、南豐集團、信和置業同華人置業等，之前一早已經表態話有興趣。
蘭西冇聽見龍頭發展商長實個名，唔知係咪因為噚日撞啱長和系公布業績，太忙呢吓？
樓市熾熱，各大地產代理行都大事擴充，搞到行內人手十分短缺，不斷要招聘新血。
美聯物業噚日喺旺角辦咗個招聘日，重請嚟名導演李力持，向在場約二百名求職者，講解成功之道，以及上位心得，夠晒號召力。
美聯副主席張錦成同場都現身說法，分享自己二十年工作經驗，以及事業發展歷程。
美聯今次招聘日，前線空缺有代理、主管以及區域經理，後勤就有財務、人力資源、行政、廣告、公關、客戶關係，以及資訊等部門職位。