李察基爾（RichardGere）前日喺東京出席荷李活片《談情共舞》嘅首映禮，當日連電影原版《談談情．跳跳舞》嘅導演周防正行同佢嘅舞蹈家妻子兼女主角草刈民代亦畀面出席。對原版讚不絕口嘅李察更跪喺台上向草刈獻花，非常識做。
由李察基爾同珍妮花洛庇絲（JenniferLopez）主演嘅《談情共舞》，本月尾會正式喺日本上映。前日喺東京新高輪太子酒店舉行嘅首映禮非常熱鬧，除咗李察之外，導演查爾森（PeterChelsom）、李察嘅妻子嘉莉露維（CareyLowell）同埋佢個女亦盛裝到場，而套片嘅原裝日本版《談談情．跳跳舞》導演周防正行同佢嘅舞蹈家妻子兼女主角草刈民代亦被視為貴賓。
充滿紳士風度嘅李察對《談談情．跳跳舞》讚不絕口，佢話：「周防先生嘅原版非常完美，我唔會將自己嘅版本同原版電影作出比較。」佢重用日文講「ARIGATO」感激周防導演，兼重演影片中一幕，跪喺地上向喺原版電影中扮演舞蹈老師嘅草刈民代獻花。
嗰日同場又舉行咗一場社交舞表演，大會安排咗八對日本職業舞蹈員表演，其中有女舞蹈員喺台上擘髀，謀殺在場記者唔少菲林。