長和系公司派成績表，長實（001）靚過和黃（013）少少。長實升0.75元，和黃只係升得0.25元，市場人士真醒目。睇吓大股東會否增持。
長實C輪：有成交嘅長實C輪，隻隻升，最大升幅係3788，達35%，例牌交投細眉細眼。經過一輪變化後，𠵱家上車炒長實C輪，3820比較啱睇。隻輪7月尾夠鐘，輪價29仙，溢價5.3%，槓桿率23.9倍（有效11.1倍），引伸波幅22.7%。想搏殺，則向3560埋手，槓桿率爆炸好多，自然要畀高啲溢價。個市唔係睇得太好，輪價如果搶得太高，則唔適宜追貨。昨日已經有人受到教訓，早段高位搶藍籌C輪，去到收市埋單坐艇15%以上。
新地C輪：新地（016）平收70.75元，只有兩隻C輪下跌，其中1隻係4643。新地如果再下試70元大關，搵C輪博反彈，可以揀4643。隻輪數據靚，6月初夠鐘，輪價25.5仙，溢價2.5%，槓桿率27.8倍（有效16.6倍），引伸波幅17.2%。
滙控C輪：恒指漲91點，滙控（005）升1元，帶動指數進帳36點。滙控叫做收124元，查實收123.5元比較合理，因為埋單時123.50元買家買盤得1.1球，而沽家沽盤則有13球（全日成交都係19.3球）。因為升得唔夠實淨，所以熱門C輪冇跟貼上升。4441收19.6仙，升得1.2仙。4445收11.6仙，升得1.1仙。兩隻C輪低位可以博吓，前者槓桿率63倍，後者107倍，有心理準備波幅非常刺激。
恒指C輪：4月期指升得20點（恒指升91點），低水96點，唔多好，有恒指C輪在手者，要當心。
章盛