澳門開放賭權，帶挈成個濠江賭業都朝氣勃勃，賭王何鴻燊（圖）旗下多間博彩公司，不少都錄得理想業績，好似澳門博彩股份有限公司，去年有四十億元純利，澳門賽馬會亦止蝕回升，舊年賺咗五千萬。不過，賭王亦有燒鬚時，佢旗下亦唔係間間公司都賺錢，澳門逸園賽狗場去年就蝕咗四百多萬元。
賭王多間博彩公司噚日喺澳門召開股東大會，佢老人家話，計劃將部份賽狗場賽事，安排喺氹仔賽馬場內舉行，據知現時全世界都冇話喺馬場內跑狗，經過研究同埋實地考察，佢認為此事可行性甚高。
澳門概念股早排鑊氣甚勁，炒得熱火朝天，不過賭王就表示，佢唔鼓勵亦唔贊成有香港上市公司，利用澳博嘅名義在香港上市。
傳真︰2623-9278
電郵︰[email protected]