酒店Ｙ之女婿任職投資銀行，奉調往東京，酒店Ｙ千金立即辭工，嫁夫隨夫去也。Ｙ千金亦是投資銀行職員，以為暫時犧牲份工，點知一去到東京，係咁意接觸吓啲美資大行，兩個星期內立即返工，公一份，婆一份，住在東京，享受高薪，咪話唔爽。估唔到呢行咁好景，見人就搶（有經驗之人）。
酒店Ｙ係過來人，知道投資銀行係發市當三年，好景之時切忌大使，將啲年尾花紅去買超豪跑車，佢勸啲年輕賓架最好將啲花紅收埋作退休基金，以免二十幾年之後不知所措。
講就係咁講，年輕賓架聽唔聽得入耳就係另一回事。ＨＲ（humanresources）專家呢排嘆息請人不易，獵頭族唔肯做狩獵會計師嘅生意（因為搞餐懵都未必請得到，獵頭族覺得浪費時間）。獵頭Ａ話ＨＲ專家講得冇錯，佢都唔想做會計師狩獵，只想捕捉投資銀行家啫，因為人工高，佣金多吖嘛。
獵頭Ａ喊咁口話：「最近見財化水，我幫一家證券行搵分析師，鎖定目標之後，鼓其如簧之舌，講好咗加薪百之三十，年薪（包埋花紅）由三十幾萬美元加至近五十萬美元，並且教埋分析師點樣同上司講辭職。」
點知分析師同上司一講，上司立即搵番佢個大老闆出馬，二話不說，就建議延長合約二年，年薪連花紅加到七十五萬美元，並且請埋分析師太太上公司，送夫妻兩人去歐洲度假一星期。分析師太太眼都大埋，要分析師簽延期合約。第二日，公司將分析師嘅電郵地址、公司電話、手機改晒，獵頭Ａ一時之間無法子搵到佢，第三日聽聞風聲，人哋兩公婆已經到咗巴黎觀光咯。獵頭Ａ睇住佣金落到袋跌番出嚟，呻到樹葉都落埋，左丁山只能寄以無限同情。