蘭西情報課:<br>居屋活躍麗晶康華苑雙冠軍

蘭西情報課:
居屋活躍麗晶康華苑雙冠軍

中原報告,今個月截至二十四號,二手居屋買賣登記,包括自由市場同第二市場,已經有五百四十八宗,估計全月達六百三十宗,比二月五百一十五宗多兩成二。
中記黃良昇話,若果唔係有復活節,估計會重理想,可見二手居屋都好受歡迎。
不過,總結第一季條數,預期二手居屋買賣得一千八百五十宗,比舊年第四季嘅二千一百二十五宗少近一成三。
登記宗數較多嘅居屋苑,九龍灣麗晶花園以四十六宗佔第一位,蘭西記得,喺按月嘅數字,麗晶曾經輸過畀其他居屋苑。
今季登記出現雙冠軍,另一個係藍田康華苑。跟住係鑽石山龍蟠苑同火炭穗禾苑,同有四十二宗登記。

美記濠江豬籠入水
香港樓市好景,大家有目共睹,澳門又點呢?睇吓美記公布嘅資料就知。
美記區董楊朗明話,澳門八間分行今個月營業額共四百萬,其中氹仔寶龍分行重係第一間營業額破百萬,報一百五十萬,促成五十宗買賣。第二位氹仔花城分行,都有八十萬生意。
睇番香港成績,美記執董陳坤興話,住宅部至今已有超過十一間分行營業額逾二百萬,集團喺復活節前搞咗個比賽,月底前按促成嘅交易計,達到規定分數,就可以有三千蚊獎金,估唔到六日之內,已有十間分行達標。
另外,利記執董廖偉強話,今個月有逾二十間分行營業額逾一百萬,比二月多近兩倍。

apm未開先旺
觀塘apm商場試業冇耐,新地租務部馮秀炎話,復活節每日人流十二萬,拍得住開咗十幾年嘅大埔超級城。
馮秀炎每日巡場兩次,務求了解租戶與消費者意見,睇有乜地方要改善。
噚日唔係假期,蘭西都喺個場入面巧遇伊人,佢好熱情向蘭西介紹個場,蘭西見佢咁投入,簡直好似自己親生BB咁。現場所見,新地除咗喺個場擺放好多大大小小復活蛋應節,搵咗好多少女扮巨型花蝴蝶同小朋友影相,好有春天feel。

凱旋門水晶廳重皮
新地尖沙嘴凱旋門,講咗好耐嘅示範單位重未有得睇,噚日開放嘅Baccarat水晶單位精華預覽廳,只能夠暫時止吓渴。
新地雷霆話,淨係預覽廳,費用都要三百萬,地方唔算大,計落每呎要四千蚊,開放至下月五號,買家若買十五萬水晶,就會有八五折。
不過,講咗咁耐,雷霆都係嗰句,重等緊售樓紙,希望兩星期內攞到,開售首天諗住先推三十間千六呎四房,同埋十間二千三呎四房,呎價萬八至二萬五。
電郵地址:[email protected]

美記氹仔寶龍分行,舊年十一月至開張,今個月成績已破百萬大關,而且唔使靠大手成交㖭。

馮秀炎每日巡場兩轉,睇怕apm正式開張唔會有乜錯漏。