皇家馬德里禮拜日透過官方網宣布，朗拿度已經得到巴西足總批准，嚟緊六月喺德國舉行嘅洲際國家盃得到免役。不過，巴西足總日前即刻發表嚴正聲明作出否認。皇家馬德里方面一而再「先斬後奏」，巴西足總高層唔起火至奇。
我諗波迷都記得上個月初朗拿度唔隨巴西來港賀歲，又係先由皇馬單方面透過官方網站公布；家吓皇馬似乎又喺雙方未傾掂數就單方面公布呢個消息，真係有啲夾硬嚟。
我求大俠覺得朗拿度最後唔踢呢項賽事一啲都唔奇，之但係巴西始終有權召佢出賽，𠵱家皇馬咁做，再次掀起球會同國家隊之間嘅衝突，講到尾，只會搞到朗拿度成為磨心。「大哨」呢期咁失意，唔好再煩佢啦！
阿根廷前鋒泰維斯嘅前女友生咗個BB，原來佢細前女友八歲，可能後生仔唔夠定性，加上天性風流，最後激到大肚女友忍受唔到而「走佬」。查實泰維斯一路重係好鍾意對方，希望BB出世之後，可以令浪子回頭，感動到前女友回心轉意，同番佢係埋一齊喇！
朗尼女友高蓮喺西班牙「媾仔兼開片」曝光後，前日提前返英國箍煲，重親自開車接朗尼出嚟傾；不過聽聞朗尼全程面黑，望都唔望高蓮，好似唔多受落。其實，朗尼都唔使咁唔開心，因為早前報稱喺夜店俾佢打嘅學生哥，已經決定唔告佢；希望佢心情好番啲會原諒高蓮喇！
前日係AC米蘭中場雷哥斯達三十三歲牛一，當日佢同家人由埃及坐小型飛機降落意大利米蘭時，飛機突然起火，好彩消防員及時趕到，「達哥」一家先無事，而「達哥」事後都覺得執番身彩。大難不死必有後福，嚟緊AC連場大戰，唔知「達哥」有冇多啲上陣機會呢？
查爾頓係其中一支有機會爭踢下屆歐洲賽嘅球隊，球會為咗達成目標，決定重施故技，提供免費巴士接載球迷睇球隊作客賽事，務求多啲球迷支持；而四月九號南下樸茨茅夫嘅巴士已接受報名。如果呢場留畀查爾頓球迷嘅一千七百張波飛賣晒，話唔定其他球隊會相繼效法。
逢周一至周五見報