是日恒指最叻升過48點，最差跌過55點，高低波幅103點，埋單微升13點。
大家都喺度等長和系今日派成績表。半年前長和系派中期成績表後，大股東即刻急不及待增持和黃（013），今鋪如果有同樣情況，個市氣氛都會好啲，但唔適宜期望有大陽春。
恒指C輪：有成交嘅恒指C輪，呢兩日件件見過新低。短期內，恒指估計喺百幾點範圍內上落，想喺呢個波幅內揸恒指C輪搵食，3717係啱睇嘅對象。隻輪6月底夠鐘，輪價7.7仙，溢價2.7%，槓桿率34.9倍（有效17.1倍），引伸波幅15.9%。條數咁計，恒指升跌100點計，隻輪變化12%左右。即係話，揸隻輪一兩日之間有權賺20%（恒指升160點嘅話），亦可以輸20%（恒指跌160點嘅話），所以上車之前要先計吓自己能夠承受幾大風險。
想搏命少少，揀5月底到期嘅3564，上落波動比3717大2至3成。
中石油C輪：紐約油價又再升升哋，中石油（857）爬高3格，收4.85元，C輪3600升26%，收17.3仙。吼正股間唔中回軟，低買C輪，最好揀遠期些少嗰隻，對象係3610，年底到期，輪價33.5仙，溢價3.4%，槓桿率14.5倍（有效7.9倍），引伸波幅20.3%。正股唔回落，則無謂高追。
中鋁C輪：中鋁（2600）盤數算係咁，股價則退後5仙，收4.50元，C輪4533散26%，3535散21%。兩隻輪分別喺6月頭與6月尾到期，溢價分別係23%與19%，咪貪平，兩隻輪下場衰多過唔衰。中鋁如果再跌，博C輪，3767勉強可以睇得上眼。
章盛