有線昨日公開娛樂新聞台主播陸浩明訪問文雋的錄音，文雋在對話中清晰表明不想有線在無綫未播完節目前公布得獎結果，更表示連星光大道的片段也不希望對方先播。以下為部份對話內容：
陸：我哋想清楚知道乜嘢唔拍得？
文：星光大道咯，同埋新聞發布會，攞獎嘅會講得獎感受。我哋同TVB有約，我同你哋新聞台同余詠珊都講咗，嘥晒我啲時間，講到明遊戲規則係咁，我好憎你哋立亂濫用新聞自由，呢個係我哋電影界閂埋門做嘅活動，係我哋同TVB、now.com、港台嘅商業活動，你諗吓，十點半完騷，人哋重有六個獎未頒，你哋就同我公布晒出嚟，咁對TVBfair咩？我知道你有錄音，但我都係咁講㗎嘞。
陸：星光大道之前啲訪問可唔可以出？
文：suppose都唔出得㗎！你哋都唔爭在嗰幾個鐘啦。
陸：我𠵱家過嚟同你做個訪問得唔得？
文：唔得，我唔想同你哋爭論，對你哋嚟講係新聞，對我嚟講係nothing。
文雋到此掛線，其後陸浩明再次致電。
文：你真係阻我，我冇必要應付你哋cable，我九千幾樣嘢做緊。
陸：我唔明點解要十一點四十五分先出街，可唔可以書面……
文：如果有嘢跌落嚟跌襯咁就係新聞，其他頒獎禮發生任何嘢都係我私人party，我哋同TVB有合約㗎。
陸：乜唔係公開活動咩？奧斯卡都冇咁。
文：對唔住，唔係公開活動，係我金像獎邀請啲人嚟㗎，唔係公開party……
陸：但政府有資助喎？
文：政府有資助都有場地規矩啦，你再打嚟，我唔會聽你電話，因為你嘥我時間。
陸：可唔可以白紙黑字講明乜嘢唔拍得？
文：唔係你咁嘅身份嘅人要求我就會寫，你陸浩明叫到我文雋就要回信呀？咁啱唔啱規矩呀？請你老闆或者新聞部嘅主管寫封正式嘅信嚟，我哋董事局再考慮回唔回信啦！