趙飛雲噚日去到股票行，發覺多咗散戶上嚟睇市，原來周二晚美股先升後跌，杜指下跌79點，收10405，唔少人諗住淡友會在期指結算日再展攻勢，睇吓有冇機會在低位執平貨。
點知港股噚日未見大幅低開，跌唔落之餘又冇好大動力買上，走勢較預期平靜，恒指最後升13點收13425。即月期指升15點，結算價13410，而4月期指則平收13400。睇嚟大戶前日已做完嘢，所以昨日市勢較為平淡。
睇嚟恒指有機會如趙飛雲所料，3月守穩10月線（13318），4月初展開技術反彈，但反彈幅度可能相當有限，估計會止於13650水平，然後再回頭考驗昨日低位13357，若然失守及進一步跌穿1月底部13320，則繼續尋底之旅，向下考驗13000-12800支持區；相反若未跌近13357已見有買盤力托，並掉頭升穿20日線，則有機會見底回升。
現階段而言，趙飛雲傾向相信恒指反彈至13600水平便受阻而回，並會跌穿1月底部繼續尋底。但由於恒指昨日插得不夠深，買恒指Call輪博反彈欠值博率，所以做少一瓣，寧願等大市反彈至13600受阻回頭時追入恒指Put輪。
大市未確認見底前，股票基本上盡量少沾手，但過往炒開的遠東發展（035）、中信21世紀（241）則仍會繼續留意走勢，而優質大藍籌如滙控（005）、新地（016）、及太A（019）等亦會候低買入。
希望港股走勢真如去年一樣，上半年跌市，提供低吸機會，下半年升市，收割獲利。
趙飛雲