大市話就話升咗13點，但好多股份仍然表現牛皮，尤其係澳門賭業股，可能因嘉華國際（173）同嘉華建材（027）遲遲未見復牌有關，而龍頭股如新濠（200）同信德（242）股價回軟，亦令大家失去方向。
不過，今日話晒係季結，斷估芬佬為咗粉飾櫥窗，點都唔會出嚟沽貨，希望大市可以好睇啲。經紀黃話，現時最好就係買股唔買市，繼續發掘優質股作中長線持有。
上次佢話大成生化（809）跌得過份，股價瞬即反彈。今日佢又有推介，就係眼鏡股泰興光學（389）。隻股最近因為有芬佬沽貨，股價不斷尋底，噚日更一度跌至最低5.35元，收5.50元，跌2.66％，成交股數248萬股，金額1363萬元。
經紀黃話，泰興早排收購美國眼鏡連鎖店獲一致好評，其後喺2月份配股，當時配股價每股5.724元，之後股價一度抽上最高6.90元，芬佬見有利可圖，隨即沽貨套利，所以泰興股價先至跌得咁淒涼，其實基本因素並無大變，況且人棄我取，另外有芬佬不斷低位收貨，現水平跟進，有一定值博率。
慕容小初