反曾亂港大行動，終於初遇挫折！當撈曾榮獲港澳辦主任廖暉召見，跟住就有消息放出，宣稱中國政府全力挺曾，並警告有關滋事分子，不得以一大堆狗屎垃圾藉口為名，唔聽何鴻燊規勸，替中央添煩添亂！
收到未？收唔到嘅，就即管再亂噏喇！反煲呔曾，即是反胡溫曾，反胡溫曾，即是反華反共反十三億人民！一條方程式，一加一等於二，就係咁簡單。反曾亂港聯盟係咪要集體蒙召上北京，由曾慶紅副主席由頭教過乜嘢叫基本算術？
壽爺有令：社會要和諧、團結，不得為國家添煩添亂！民建聯公然抗命，精人出口，笨人出手，點咗個田少盲舂舂出嚟「挑戰」當撈曾，即是公然當壽爺──黃金六秒大揸扒嘅聖旨冇到！正如李國章話頭：換咗在古代，咁即是大逆犯上，一早要斬頭！
嗱！連新加坡國父李光耀，都大讚曾蔭權爵士年少有為，學嘢應該醒扒過廢董！當撈曾得到國際政要支持，證明英國佬親手畀嘅爵士勳銜，果然唔同暴動首領都有嘅嗰隻大紫荊，喺國際上晒出嚟，都有少少力！
到咗今時今日，土共妄圖「挑戰」胡溫曾（曾係曾蔭權個曾喎）即使失敗，對爵士嘅人格、名譽、執政權威，經已造成不可挽回嘅損失，搞到爵士未坐正，慘遭歧視，被加上港英餘孽標籤，經已灰頭土臉，背脊同埋塊面皮，都一樣畀人畫到花晒，咁應該點樣賠償先？係咪應該由民建聯及自由黨，自資登番個全版廣告，喺全港各大報章，好似榮賀楊利偉飛天一樣，慶賀當撈做特首成功？唔表態，即是反對抵制咁解！
傳真︰2623-9278
電郵︰[email protected]