醫生Ｗ約食午飯，時間係一時十五分，比較少有。想深一層，醫生上午睇症，好難知道幾時可以起身去食飯，約一點一個骨，係唔想老友早到等候而已。
如時赴約，醫生Ｗ話另一位老友醫生Ｋ有更多病人，唔知幾時嚟，大家食嘢先。果然要等多十五分鐘，醫生Ｋ先至趕到，今日居然打咗煲呔。醫生Ｋ話：「我算唔算政治正確？」或者係啦，曾校長（唔係曾司長）竟然透露，九七年選特首，佢嘅第一票係投畀吳光正嘅，點解曾校長七年多以嚟都唔講，𠵱家先至開口呢？莫非係要（一）與董先生正式割席；（二）現在係適當時機，意有所指？咁搞法，曾司長上位尚未成功，仍須努力。我哋唔打呔，改掛煲呔，未必百分百政治正確。
醫生Ｋ做到停唔到手，病人源源不絕，其中一個源頭係在珠三角設廠商人。上面工業發達，醫療追唔上，西醫水準參差，都唔知信邊個好，所以好多人走番落嚟睇香港專家，攞第二意見，唔好下下走去做手術。有埋自由行之後，內地大款、富戶來港睇症，令醫生啲生意更好。
據廠家Ｆ同左丁山講，珠三角嘅治安其實唔係幾好，佢有幾位廠家朋友在順德、東莞晚上食完飯，行返工廠之時，被攔途截劫，打斷肋骨，要返嚟香港求診，另一位上海大款住在豪宅區獨立屋，賊人入屋行劫，大款手腳被斬斷筋，呢班不幸人士全部來港就醫。據佢所知，養和醫院有名牌效應，頭等房病人經常係來自北京、上海嘅富戶，香港有錢人都未必入得到。所以呢，曾司長變成曾特首之後，理宜發展香港成為亞洲醫療中心，淨係做中國病人生意，啲醫生?私家醫院都做唔切，屆時啲醫生好可能人人打煲呔，公共醫生會紛紛請辭出外執業，醫管局就唔使為財赤傷腦筋咯。