雖然中信泰富全間公司喺○三同埋○四年減薪，但噚日八方翻看中信泰富○四年度年報，發覺十六個董事中，竟然有一半人加咗董事酬金！莫非董事局叫屬下員工同公司共度時艱，自己就……睇真啲，至發覺董事薪金確係減咗，平均減幅更達到一成半㖭。不過，袍金同花紅就反而增加咗六成一同埋兩成四，其中主席榮智健同埋董事總經理范鴻齡嘅董事酬金重加咗七百萬同埋六百萬元，榮太子人工接近三千零五十萬元；范鴻齡就差不多二千六百萬元。
何解？原來中信泰富喺舊年十一月一日，畀咗部份董事及員工一批購股權，行使價每股十九個九，兩個人分別獲授二百萬股及一百六十萬元，連榮太子嘅公子榮明杰都有五十萬股，由於去年底中信泰富股價升到二十二元一角，較行使價升咗一成一。根據香港會計準則，呢個紙上進帳都要計埋入花紅入邊，所以咪出現加人工嘅情況囉！差啲怪錯佢哋㖭。
傳真︰2623-9278
電郵︰[email protected]