金像影后妮歌潔曼（NicoleKidman）早排盛傳同荷李活名監製史提夫冰（SteveBing）訂婚，後來又俾人話同利比亞國腳兼領袖卡達菲個仔薩迪（Al-SaadiGaddafi）喺澳洲密會。一向對戀情三緘其口嘅妮歌對近日嘅傳言不勝其煩，日前終於否認晒所有緋聞。
妮歌日前接受澳洲傳媒訪問時，被問到佢同史提夫冰嘅緋聞，妮歌劈頭就話：「我哋只係朋友。」至於話利比亞花花公子薩迪同佢多番約會，妮歌話：「我哋不過係傾公事。」其後妮歌重大呻：「喺我嘅情況，做單身女人真係好難。」
不過，澳洲八卦雜誌《Woman'sDay》就有另一個版本，雜誌報道話妮歌日前約男友史提夫冰同屋企人食飯，順便向父母公布佢哋嘅婚訊。據講妮歌臨走時見門外成棚記者，所以叫男友由後門走，妮歌出門口嗰陣重特登將隻左手收喺背脊，意圖遮住隻訂婚戒指。據妮歌個老友爆料，妮歌曾經話想正正式式生番個仔，不過史提夫冰似乎唔想結婚喎！
此外，妮歌同金像影帝辛潘（SeanPenn）合作嗰套《叛譯者》，已經鐵定於下星期一喺悉尼作全球首映，到時妮歌都會現身。
《叛》片係首套喺聯合國總部取景嘅戲，妮歌話拍呢套片獲益良多，其間佢向聯合國繙譯員取經，重同聯合國秘書長安南會面㖭。