八両金、朱咪咪同吳文忻等前晚喺將軍澳電視廣播城錄影《繼續無敵獎門人》，獎門人曾志偉刻意安排朱咪咪同八両金一對玩遊戲，點知佢兩個互相嫌棄對方，之後八両金揀吳文忻跳舞嗰陣，重唔小心一手㩒咗落吳文忻個胸度㖭！
曾志偉喺遊戲度特登安排朱咪咪同八両金一齊，佢兩個被安排玩碌地，朱咪咪好唔願意，錢嘉樂話：「十年未見過佢咁驚，呢套係《見鬼11》。」
朱咪咪就話：「我當俾鬼壓。」八両金之後反駁：「佢呢件豬扒，成二百磅，點轉呀？我寧願揀吳文忻。」朱咪咪聽到就好嬲咁講：「我怕同佢碌完，以後對男人冇興趣。」結果曾志偉怕咗佢兩個，唔使佢哋玩。
之後八両金同吳文忻跳舞時，佢抱起吳文忻時竟然一手㩒落佢個胸度，問吳文忻會唔會覺被非禮，佢話：「佢一手㩒落嚟，都冇心嘅，唔介意嘅，不過佢玩得好投入，可能以為嗰度係條腰，攬高咗。」
另外，八両金企喺朱咪咪同吳文忻中間玩嘴對嘴傳紫菜時，朱咪咪明顯好避忌，重唔小心仆落地，八両金情急起嚟重捉住吳文忻傳紫菜，點知佢棚牙唔小心撞咗落吳文忻個鼻度，搞到吳文忻起晒紅印，錢嘉樂即刻笑吳文忻要claim工傷。
吳卓羲近日受無綫力捧，但馮仁昭聽到有傳聞話佢胞兄曾吸毒同犯事入獄，重喺吳卓羲細細個時死咗。吳卓羲噚日透過無綫外事部回應：「我一直對屋企人同家庭好關心同愛錫，佢哋唔係公眾人物，所以我對外間嘅傳聞唔會回應，希望外間可以畀啲空間佢哋。」無綫亦表示會繼續支持吳卓羲，同埋協助佢解決任何困難。
女子組合2R昨日到商台接受訪問，前日香港電影金像獎公布咗各大獎項頭三位嘅名次，妹妹Race憑《死亡寫真》而角逐的「最佳新人」獎，最終屈居第二，輸咗畀演《蝴蝶》嘅田原，問Race有冇覺得好可惜？佢話：「冇喎，攞到第二都好開心啦。」
《大長今》播到𠵱家收視一直高企，好多香港觀眾都希望可以一睹劇中演員嘅風采，李英愛雖然唔得閒嚟香港，但男主角閔正浩同小長今就會喺下月中嚟香港見觀眾，最近重有消息指飾演長今師傅韓尚宮嘅梁美京會搶閘嚟先，佢喺下星期六（四月九日）出席奧海城一個活動，韓尚宮雖然喺劇中已死，但佢嗰段劇情賺人熱淚，相信到時唔少觀眾都會去捧場。
陳栢霖同梁洛施有份主演嘅《見鬼10》喺香港上映咗一個禮拜，計埋台灣、馬來西亞及新加坡三個地方，總票房暫時有一千五百萬，成績理想，梁洛施話：「呢部戲係我第一部喺香港上映嘅電影，所以我好緊張，得知大家滿意我表現，我先安心。」
元秋前晚喺港台接受訪問，元秋話最近接拍咗部新戲，又係同元華合作，問到佢有冇親熱戲，元秋講笑咁話：「冇親熱戲，不過有啲床上戲，又要同佢談情說愛囉。」佢話大家咁熟唔會尷尬，不過佢就話細個嘅時候就曾經同元華為咗一個衫架而打交。
