港股連跌4日，合共下跌400多點後，噚日終於喘穩，恒指收市13425，升13點，成交149億元，4月期指低水25點。
大市止跌，是否見底，言之尚早，但若未來兩三日出現反彈，而反彈後又能守穩在噚日低位13357之上，則唔排除中期調整已完成；所以，恒指一日未跌破13320，都不宜睇得太淡。
問芬佬意見，佢哋短期都係睇上落市居多，但若到4月中之時，恒指仍能守穩在13320之上，最好係企於13500至13600水平，則除咗短期圖表確實轉好外，中期亦會出現入貨訊號，第2季股市有機會重上14000點大關，升越14339，創出今年新高。
YGM貿易（375）在2月初時曾作推介，當時股價13.1元，初步上升目標看16元。3月7日，YGM高價曾見15.75元，近日又回落到13元水平，基金玩波幅，應係另一次低吸機會。
現年度（05年3月結），估計盈利1.7億元，每股盈利1.09元，以大型零售股仍屬偏低的15倍PE計，股價已可見16.3元。下年度，新品牌提供貢獻，盈利可進一步上升。
集團去年收購GuyLaroche（GL）及CharlesJordan（CJ）後，在港澳、中國和台灣共經營5個品牌成衣；04年9月底（中期結算日），集團的零售網絡已擴大到261間門市，包括中國內地171間、香港40間、澳門6間同台灣44間。到04年12月底，門市總數上升到265間。
YGM已變身基金股，基金有信心，主要係看好GL及CJ會成為YGM未來盈利增長的主要動力。集團會將CJ發展成經典男女時裝服飾品牌，並開設6至8間專門店，其中兩間在香港，4至6間在內地。
富豪酒店（078）早前升上0.73元後，出現調整，噚日收0.67元，跌2仙，走勢仍保持一浪高於一浪格局。富豪已定4月11日宣布末期業績，全年盈利視乎富豪海灣售樓入帳方式而定，但應不會少於8.5億元，每股盈利約10仙。富豪落實濠江發展大計後，已有大行寫報告，出街之後，富豪股價有機會重行遠展（035）舊路，上升6成。
郭兆誠