民主黨主席李永達前日同太太陳樹英去澳洲西岸旅行。達仔夫婦上次去泰國布吉，就啱啱遇上南亞海嘯，今次去澳洲，附近又發生大地震。
達仔去親邊度，附近都發生大災難，睇怕以後中央都唔敢搵佢訪京，為咗地球人嘅福祉，怕且達仔第日都係唔好去旅行啦。
達仔上次冇帶手提電話，搞到全世界人都搵唔到佢，一度生死未卜，佢返到香港就話日後一定會帶手機喎。八方知道發生地震後，第一時間打電話畀佢哋，但兩個人嘅手機都飛晒落call機，睇怕佢哋又冇帶電話。
八方問副主席何俊仁，達仔係咪又唔記得帶電話？仁哥就同八方講，佢唔知達仔有冇帶電話，不過佢都留咗個緊急聯絡電話畀佢，應該唔會發生上次嘅情況啦！
另外，八方噚日話湯家驊從日本返香港，原來搞錯咗，湯大狀喺今日先返香港，返到香港第一件事就要爭做特首選舉條例嘅草案委員會主席。不過保皇黨應該會推舉譚耀宗做，睇嚟湯大狀都係爭唔贏啦。
傳真︰2623-9278
電郵︰[email protected]