叫你唔食甜品得唔得？十個女仔有九個都會即時抗議！即使正在減肥中，可能都會寧願唔食飯，留番個位食甜品；就算食飽飯，個個都話自己有第二個胃專載甜品！又怕肥、又要食，即睇營養師教你點樣狂擦甜品都唔怕肥！
記者：馬靜兒 攝影：陳陶鈞 Model：Va
鳴謝：米施洛營養中心王嘉茜營養師（28902798）
女仔對甜品和靚衫都是一樣，天生無法拒絕。既然無女仔可以抗拒甜品的誘惑，就要食得聰明一點，搞清楚致肥原因，對症下藥。
減熱量唔怕肥
營養師王嘉茜分析：「甜品致肥，原因好簡單，因為甜品所含的碳水化合物、脂肪和蛋白質帶來高熱量所致。只要選取適當的代替品就可以減低熱量，如用代糖或水果代替白糖、用脫脂奶代替全脂奶、以蛋白代替蛋黃，每樣都減低一點卡路里，總熱量就自然減低很多，變相可以食多啲都唔怕肥。」營養師還建議，做曲奇餅可用蘋果茸代替牛油，做蛋糕就可以用乾果代替白糖。如果你習慣飯後食甜品，那麼正餐就要食少一點；而食蛋糕時，就最好將面層忌廉棄掉。
三大致肥元兇
白糖
甜品因為有糖份所以味道甜美，但大部份甜品所用的白糖熱量都很高，因為1茶匙白糖就含20卡路里。解決方法是改用代糖，3茶匙的代糖已有1茶匙白糖的甜度，但只有4卡路里，熱量只是白糖的5。如果自製甜品時，更可用乾果代替白糖，由於乾果含維他命C和纖維，相對而言較健康。
蛋黃
蛋黃有55卡路里，而且含有膽固醇，蛋白僅17卡路里，熱量不足蛋黃的一半，所以食蛋白比蛋黃健康得多。
全脂奶
一杯全脂奶有150卡路里，但一杯脫脂奶只有80卡路里。所以自製蛋糕時，可以用脫脂奶代替全脂奶。
想瘦有數計
營養師指出，女性每日需攝入1,400至1,600卡路里，男性就需攝入1,800至2,200卡路里，扣除三餐正餐，理論上每人進食的甜品量不可多於每日所需卡路里的10%，即女士最多可以吃160卡路里，男士最多可以吃220卡路里。不過，通常食店裏一客甜品一般都有200-300卡路里，一個唔覺意好易爆Quota。
十大低卡甜品
甜品雖然致肥陷阱處處，但不代表要全部禁食。不過出街食由於難以知道材料和份量，所以好難控制，反而返屋企自家製就可以諗諗計！左減一點，右減一點，熱量有數得計。
無糖啫喱10kcal
大型超市有無糖啫喱粉出售，自製啫喱無問題。
雪葩20kcal
以水果雪成冰粒，再以攪拌機攪成雪葩，不另加糖。
鮮果涼粉40kcal
涼粉屬低熱量，配以奇異果、西瓜等水果一齊食，以甜味的水果代替糖水，食多了都無問題。
西瓜汁西米露90kcal
以西瓜水做汁底，加西米和奇異果等低卡路里的水果就最健康。
木瓜燉雪耳95kcal
木瓜有甜味，將平日慣用的冰糖改做代糖就可以。
綠豆沙100kcal
只要用代糖取替白糖就OK！
湯圓100kcal
棄用芝麻、蓮蓉等高熱量餡料，以栗子茸代替，或改做無餡湯圓。薑汁糖水則可換以代糖取替片糖。
豆腐花100kcal
不加糖水，不加黃糖，只以少許代糖調味。
薑汁燉蛋白鮮奶 135kcal
用脫脂奶和薑汁，加上低熱量的蛋白製造，熱量不會太高。
喳咋135kcal
喳咋用的是豆類，記得自製時不要加椰汁。
唔係嘛！咁鬼肥！
有些甜品表面好似無忌廉、無脂肪，令人錯覺食多啲都冇有怕，但其實好肥，食咗小蠻腰變水泡腰。
１.FatFree雪糕熱量低？
250-300kcal
別以為FatFree雪糕不會致肥，為了令雪糕口感幼滑，坊間通常不是加奶就加糖，做出幼滑口感。記住！雪糕愈滑愈肥。
2.椰汁西米露唔怕肥？
200kcal
西米雖然熱量低，但碰上含88%飽和脂肪的椰汁，它就是致肥元兇。
３.Tiramisu
400kcal
一杯Tiramisu內足足有12茶匙忌廉，肥死！
４.合桃露
300kcal
合桃含的雖然是不飽和脂肪，有助降低膽固醇，但熱量強勁。
５.白果腐竹糖水
300kcal
因為腐竹經過油炸，所以脂肪含量大大提升。此外，由於冰糖所含熱量高，令一碗望落「清清哋」的糖水，熱量驚人。
