建滔化工（148）自從完成私有化依利安達之後，股價一直升個唔停，就算呢排持續跌市，建滔股價都一直企硬，噚日大市跌成185點，建滔竟然逆市再創新高，升1.83％，收25.05元。
建滔噚日成交暢旺，成交股數有253萬股，金額6332萬元。
經紀黃話，建滔近排股價氣勢如虹，皆因有唔少人偷步炒業績，隻股今日公布04年全年業績，證券界一般估計賺10億銀樓上，而且繼續睇好建滔來年業務增長，一來收購依利安達後，營業額會併入建滔；二來作為主業的積層板業務，估計今明兩年會穩步上升；三來臨近季尾，芬佬點都會玩吓櫥窗粉飾。據講有好幾間證券行，已經將建滔目標調升至30元。
不過，值得留意係建滔收購依利安達之後，負債比率上升，雖然公司去年曾配股集資，但家陣股價咁靚仔，如果有人趁勢搞批股，小初唔會覺得出奇。
慕容小初