傅珮嘉早排喺電台派新歌，但佢自從喺本月頭出席過BMA唱片公司嘅春茗後，喺過去嘅三個星期都冇出席公開活動。噚日傅珮嘉去商台接受訪問時，容貌竟然起咗變化，本來又扁又彎嘅鼻樑，變得又高又直，令人懷疑佢整過容。
入行六年嘅傅珮嘉一向都俾人擠出靚女行列，雖然佢有靚聲同音樂才華，可惜一直欠缺時機。其實傅珮嘉背後俾人起咗個花名「泥娃娃」，即係形容佢塊面夠扁，今次佢個鼻突然變高咗，唔知可唔可以一轉星運呢？
傅珮嘉噚日當然唔會自爆個鼻高咗，只係猛話五月出碟，碟中有唔少自己嘅作品，其中一首歌重想搵個男歌手同佢featuring，陳奕迅同麥浚龍都係心水人選喎！
之前林峯同周汶錡都曾經被傳整鼻，不過佢哋都否認，馮仁昭知道娛樂圈有唔少明星有人造身材同容貌，但至今只得名模樂基兒肯承認隆胸，佢嘅坦白同勇氣實在令人佩服，自從佢認咗之後，事業不跌反升，證明𠵱家啲人都係鍾意明星夠坦白。
梁漢文（右）噚日擔任Roadshow節目主持，請咗陳奕迅（Eason）同組合at17做嘉賓。梁漢文話曾經同Eason一齊喺台灣經歷地震，佢話發生地震嘅時候，Eason竟然唔係即時逃生，而係攞番包香煙。我馮仁昭覺得Eason就算唔顧命仔，都顧吓囡囡吖！
無綫剛公布上周收視，韓劇《大長今》仍然節節領先，比前周升咗兩點，有三十五點收視，約二百二十九萬人收睇。至於香港電影界盛事「香港金像獎頒獎典禮」仍冇乜起色，舊年無綫直播頒獎禮，因為遷就廣告而cut咗部份得獎者嘅片段，惹嚟好多投訴；今年無綫雖然改為轉播，之前又大事宣傳話群星齊集，但最後收視只有二十五點，大約一百六十四萬人次收睇，輸長今成條街。
台聯黨團不滿公視《UBU硬地音樂展》節目中，播咗羅大佑疑諷刺台灣前總統李登輝嘅歌曲《阿輝飼著一隻狗》，公視噚日發出新聞稿話要向相關人致歉。由於羅大佑𠵱家唔喺台灣，但佢嘅朋友就好唔滿意咁話：「他二十年來都是說想說的話，唱想唱的歌，而且歌名就是《阿輝飼著一隻狗》，你看這回狗不是出來咬人了嗎？」
陳苑淇早前簽約陳少寶成立嘅經理人公司，成為公司頭炮力捧嘅藝人，噚日佢以婚紗店代言人身份到九龍塘示範新裝同婚紗，酬勞滿意。
陳苑淇換咗三套衫，更出動私伙首飾。不過馮仁昭覺得成個活動最慘就係客串扮新郎嘅陳國坤，因為佢要抱起陳苑淇影相，搞到手騰腳震！
