廢董落台，果然係牆倒眾人推，民建聯前主席兼廢董前「執政大聯盟」成員及行政會議成員曾鈺成劃清界線，自爆話民建聯好多人查實唔係支持董建華，佢話自己當年，投票畀吳光正，而唔係廢董！
吓？咁八年以來，當江太祖澤民公多次下令：「要更好地協助董建華施政」，曾前主席亦有份企喺台下，陰陰笑咁唔出聲，假意聽從江太祖聖旨！好嘞，到今日江太祖冇得撈嘞，佢先至承認自己查實係地下嘅反董分子，分分鐘重係同李柱銘裏應外合嘅㖭！
不過五十萬人7.1大遊行，又唔見曾前主席遊埋一份喎！所以唔怪得咁多人話，廢董就係俾包圍喺身邊嘅土共害死！原來一早就經已唔妥佢，後來又假意同佢組成「問責團隊」，到今時今日，廢董經已被掃入歷史垃圾堆，剩番個董婆，喺萬呎高空之中揮拳嘶喊「佢重鐵過楊傳廣，嫁老公要嫁個咁嘅」，而曾前主席就印印腳，又準備行使「投票權力」嘞！
曾前主席咁樣表態，令人警覺現時嘅「選舉委員會」制度，最大嘅問題，唔係嗰八百人冇代表性，而係投票係不記名！
投票不記名，嗰八百人「選」邊個，連國安局都冇可能知！例如今次咁，一啲人就可以偽裝假扮投咗當撈曾一票，查實入到個票站，擰轉背就投田少或者吳光正一票！張票冇得驗指紋，咁該名政治投機分子，事後就可以陰陰笑咁，當「選舉」結果係當撈曾贏，佢就可以第一時間飆前握手擁吻、熱烈祝賀，扮到好似係曾爵士頭號Fan屎咁嘞！
篤信天主教嘅曾爵士，宅心仁厚，又點意識到呢個世界有啲咁兩面三刀嘅魔間行者吖！感動起上嚟，即時將呢位仁兄邀請入行政會議，慢吓手同佢做埋結拜兄弟㖭！
咁兩年之後，輪到當撈佢撈唔掂，又或者強行通過23條，又引發五十萬人大示威，俾壽爺話佢做唔到以民為本，步廢董保外就醫嘅後塵，嗰陣時，又會輪到呢個飛身擁吻過當撈曾嘅投機分子，上電台表白，話自己當年，查實並冇投過佢票喎！
「選委會」不記名投票，不但隨時會失控，而且張票冇指紋、冇色認，太多人可以胡混博懵，隨時會令到當撈將豺狼當羔羊，進一步變咗引狼入埋室㖭！
《基本法》從未講過，「選委會」一定要不記名投票，光明正大咁開名，就可以係人係鬼，早日現形，等到當撈第日落台之日，唔會嗰時至發覺，原來自己最當係兄弟嗰個，兩年前查實係投咗吳光正，弱小心靈，遭到雙重打擊吖陰功！
傳真︰2623-9278
電郵︰[email protected]