中華總商會聯同二十二個愛國組織，喺四月二十五日將會筵開一百六十席，慶祝老董「高票」升上神枱，重會邀請政協常務副主席王中禹、統戰部長劉延東參加，表揚老董過去七年對香港嘅貢獻。
不過入場費都幾貴，中總會長霍震寰話，嚟食嘅人都要磅五舊水。話雖如此，但搞呢個慶祝會，咁多個團體夾埋重要貼多六十萬。佢又話，如果唔夾埋啲團體一齊搞，個個團體分開自己搞，咁會對老董嘅健康唔好，搞到佢要晚晚參加。
霍英東會喺晚會致歡迎詞，亞記重可能直播個晚會。有行家問寰哥，你老竇過去做政協副主席，你哋唔幫佢慶祝，點解𠵱家又同老董慶祝？寰哥就話：「或者幫佢補番慶祝。」
傳真︰2623-9278
電郵︰[email protected]