樓市旺，除咗本地薑趁機會買樓投資，外籍人士都唔放過入市機會。中記區凱恩話，一名外籍設計師，剛剛以六百八十萬，連租約買入灣仔星域軒二座中層，七百三十呎，每呎九千三百幾。
呢位外籍客，好了解香港物業市場，知道灣仔向有唔少中環金鐘上班族租住，所以買個單位投資，肯定唔怕冇人租。況且，重係連租約買入，𠵱家月收萬九蚊，回報三厘四，五月約滿後，預期新租金可以升至兩萬五千，回報升至四厘四。果然係精明投資者。
呢位外籍客嘅朋友，剛剛買賣二手樓有斬獲，唔怪得佢對熾熱嘅二手交投一清二楚啦！
矚目豪宅尖沙嘴凱旋門，市場人士等開售，已有一段日子，行內擔心，準買家熱情逐漸減退，新地今日喺中環國金中心商場，搞Baccarat水晶示範單位預展。
雖然唔係正式示範單位，開放畀傳媒同公眾參觀，但至少資料逐步曝光，止吓渴先，等市場重記得有個焦點豪宅盤就快登場。
噚日見到預展會現場重趕緊工。雖然接連有富豪排隊預留，但負責銷售人雷霆話，未攞到售樓紙，未賣得，最快下個禮拜，至可以正式開放示範單位。
香港管理專業協會（HKMA）每年舉行傑出推銷員獎比賽，今年第三十七屆，得獎者新鮮出爐，四間主要代理都有人攞獎。聞說，利記佔三席，其餘各佔兩席。
聽講，今年參賽人數係歷年之冠，有二百幾人，利記提名三個員工參加，全部獲獎，包括跑馬地成和道李淑鈴、銅鑼灣禮頓山張德昌，同埋將軍澳新都城章維。
至於舊年至開始提名參加嘅港置，執董李志成話，今年派出柏景灣同金巴利道分行員工參賽，同樣獲獎歸來。
葵涌工廈成交金額雖然唔大，不過投資者照樣可以摸貨賺錢。中記羅小媚話，葵涌工廠區今個月有四宗摸貨成交，全部獲利。
其中銀碼最細嘅一宗，係永業工廠大廈中層，一千三百呎，成交價只不過係三十一萬，業主以二十六萬買入，賺五萬。
另一個瑞森工業大廈中層一千二百幾呎單位，業主用二十五萬購入，今個月以近三十四萬摸出，執到九萬蚊，升值三成六，計落回報都算豐厚。
電郵地址：[email protected]
