究竟點先算係良心僱主，唔同人有唔同演繹，本地環保刊物《SEE》雜誌早排就搞咗個「香港大專生眼中良心機構選舉」，請咗班學生哥為恒生指數三十三隻成份股公司評吓分，結果地鐵成為佢哋心目中最具企業社會責任嘅良心機構，跟住依次就係國泰、滙豐、中電同恒生。富商李嘉誠旗下嘅公司，表現就有啲參差，長實喺十名之內，但長江基建就排尾二，唔知誠哥有乜感想？至於中遠太平洋就敬陪末席。
講番個選舉，主辦機構要求大專生就五大方面為企業評分，結果發現大專生對啲公司喺熱心公益同企業管治兩方面都給予極高評價，但就認為佢哋喺對待員工、重視環保同尊重民意三方面都做得唔夠，有近九成學生更講到明會選擇加入啲有社會責任理念嘅機構。
睇嚟啲大企業CEO真係要戙高床板諗清楚點搞好啲喇。
傳真︰2623-9278
電郵︰[email protected]