是日恒指最低13381，同1月下旬最低位13320只係相差61點，是否再試呢個低位同埋是否試底成功，好快就有分曉。埋單指數散185點，滙控（005）與中移動（941）兩隻重磅藍籌佔89點。
中移動C輪：聯通（762）派成績表，市場唔收貨，收6元，跌0.25元。聯通C輪自然冇運行，不過成交唔多，街貨少，燒親手指嘅人有限。估中聯通盤數唔靚嘅，亦都冇法子搵錢，因為聯通冇P輪炒。中移動（941）多少都受聯通拖累，收25.40元，跌0.55元。
中移動最低見過25.10元，如果再低試25元以下，博反彈買C輪嘅風險就比較細啲，對象係4571，6月尾到期，輪價12.1仙，溢價2.4%，槓桿率21倍（有效11.9倍），引伸波幅21.1%。其次3599，整體數據稍遜於4571。
恒指C輪：恒指由上月尾最高位14272回落，到𠵱家散咗861點，如果再跌，譬如話跌夠1000點，博短期技術反彈，揀恒指C輪炒，3795與3717可以諗吓。3795喺7月尾夠鐘，輪價11.6仙，溢價3.6%，槓桿率26.9倍（有效13.6倍），引伸波幅17.1%。3717喺6月尾到期，輪價7.8仙，溢價2.8%，槓桿率34.4倍（有效11.1倍），引伸波幅16.1%。
要有心理準備，呢兩隻C輪殺傷力與爆炸力都相當大，恒指上落100點等閒事，但兩隻輪嘅價格波幅就已經係10%過外。
中石化C輪：中石化（386）盤數唔錯，股價仍然要跌5仙，收3.125元，跌到3元邊邊，諗C輪3862。隻輪9月底夠鐘，輪價22仙，溢價6.2%，槓桿率14.2倍（有效7.4倍），引伸波幅26.8%。
章盛