香港電影金像獎董事會主席文雋早前指獲政府資助二百萬元公帑的頒獎禮，是「金像獎大會與無綫閂埋門的私人Party」，此言一出即引來外界非議。主辦金紫荊頒獎禮的香港影評人協會，昨日亦直指政府厚此薄彼，將公帑花在私人派對上卻不肯資助金紫荊。
第二十四屆香港電影金像獎頒獎典禮雖然已於日前舉行，但是非仍然停不了，除大會為遷就獨家轉播的無綫而要求其他電子傳媒延遲公布賽果，遭有線批評妨礙新聞自由外，金像獎董事會主席文雋接受有線訪問時，又失言指金像獎是大會與無綫閂埋門的私人Party，引起公眾嘩然。而主辦金紫荊獎頒獎禮的香港影評人協會，昨日亦發出聲明批評政府撥二百萬公帑支持一個閂埋門的私人派對，卻不肯資助金紫荊，對政府做法感遺憾。
香港影評人協會理事鄭景鴻昨日在電話中說：「金紫荊由幾年前開始向政府申請撥款，但有關方面一直話唔會資助呢類型頒獎禮，但我好唔明白政府又點解肯支持一個自認為私人party嘅電影頒獎禮，政府咁做似乎唔係咁公平。我哋個會搞金紫荊頒獎禮，一年都只係需要二十萬經費，但冇贊助商、冇政府資助，今年籌辦嘅經費都係班會員辛苦籌番嚟，既然我哋同金像獎都係搞推動影壇嘅頒獎禮，點解政府對待咁唔同？聽日（即今日）我哋會舉行記者會再詳細講呢件事。」
而撥款二百萬公帑資助金像獎的工商科技局，對於被公眾質疑，該局發言人昨在電話中回應說：「原本金像獎係由電影發展基金撥款，但因為個基金嘅錢差唔多用完，所以今年就由我哋呢邊撥錢，我哋都係按照正常申請去處理，至於金紫荊嘅申請，我就要再了解清楚。對於有人投訴文雋講金像獎係私人party，我哋唔想評論。」工商科技局局長曾俊華昨出席灣仔一活動時，對記者追問笑而不答。
就金像獎主席文雋一句「金像獎係電影界同ＴＶＢ閂埋門嘅私人派對」，引發連串風波一事，文雋昨日在電話中說：「嗰句說話其實有前有後嘅，星期六黃昏陸浩明（有線娛樂新聞台主播）打電話畀我，個電話係有錄音嘅，佢用咗十幾分鐘時間故意挑逗我回答一啲問題，當時我同張同祖、鍾繼昌一齊傾緊金像獎嘅事務，難免可能會有一兩句失言，我承認嘅，一兩句失言要揀一定會揀到，當我口快又好，情緒問題又好，九千幾樣嘢做緊又好，並唔係我嘅原意。我意思係話當金像獎自己開party，都要遵守規矩啦，呢個同濫用公帑無關，皇馬訪港夠有公帑，但都有版權所限，唔可以話新聞自由，冇畀錢嘅都可以肆意拍。」
演藝人協會會長曾志偉昨日在尖沙嘴宣傳時，亦就金像獎風波回應說：「文雋講嘅嘢我唔想回應，不過電影金像獎係九大電影屬會一齊做，係代表演藝界唯一被公認嘅評審會，政府梗係資助唯一公認嘅電影頒獎禮，我記得金像獎都唔係一申請就有，係做咗好多年先至奠定地位。」志偉又指若金紫荊頒獎禮愈辦愈好，受外間認同後，相信政府亦會支助他們。
另一方面，屬於體育和娛樂界別的立法會議員霍震霆昨日就此事回應說：「政府撥款資助電影頒獎禮，對於資源嘅運用，我同政府會監察，我覺得今年嘅金紫荊同金像獎都搞得好成功，所以我會盡量幫金紫荊爭取撥款，而金像獎同有線只係小風波，希望爭拗可以平息。」
此外，無綫播映《香港電影金像獎頒獎典禮》當晚，影視處共接獲九宗投訴，包括投訴嘉賓的國語對白未有配上字幕，播出的百年影片太殘舊，以及並非現場直播等等。
採訪：蔡丹、張止寒、張俊銘、梁錦雯
