環保署署長羅樂秉今個月底就會正式退休，佢噚日約埋班記者茶敍兼告別，少不免回顧一下過去二十四年喺香港工作嘅苦與樂。八一年嚟香港加入環境保護處（環保署前身），九六年升任署長嘅羅樂秉話，咁多年嚟最開心就係睇到港人對環保意識大大增加，成功制訂《環境影響評估條例》係佢覺得最大嘅成就同貢獻。
臨別依依，羅樂秉承認，最難忘幾年前否決九鐵喺塱原濕地興建落馬洲支線，佢話當時壓力好大，𠵱家睇番轉頭就覺得好值。另一樣嘢令佢好大感觸嘅係，港人習慣對任何收費制度都非常反感，要推行堆填區收費或其他環保稅唔易。
退休後會返澳洲嘅羅樂秉話，稍後會參與多啲教會或慈善活動，佢重講笑話，可能會諗吓加入綠色和平，對調吓崗位咁話。
傳真︰2623-9278
電郵︰[email protected]