期指結算日前夕，淡友展開大攻勢，恒指早市低見13380，最多跌過217點，午市好友部署反攻，跌幅一度收窄近百點，可惜市場傳出再有資金流走，金管局入市接下3.9億元沽盤，銀行體系結餘降至38.5億元，即時令市場關注香港銀行會否很快再加息，淡友借消息再展開攻勢，恒指最終大跌185點，收13411，期指亦跌185點，收13395。
趙飛雲上周二睇見好友未能保住13800水平，及期指在加時階段被進一步質低，已覺得好友敗象已呈，但因復活長假在即不想再戰，一念之差下放棄買入恒指Put輪3605（上周二收0.117元，昨收0.169元），以1球貨計，都咪話唔肉痛，惟有做吓阿Q安慰自己，跌市雖然贏唔到錢，但總算冇輸錢。
炒股要贏錢，其實好艱難，趙飛雲已算好勤力睇市，但正如韓非所言：「知之非難，處之則難」，好多時睇得中但未必做得到，始終要靠幸運之神眷顧。
港股昨日大跌185點，恒指日線圖出現大陰燭大幅插穿保歷加通道底（13513），以勢論勢應該未跌完，加上今日期指結算，淡友到口的肥肉自然唔會放棄，相信起碼在今日期指結算大局已定後，港股跌幅才有望收窄。
雖然港股仍未見底，但趙飛雲仍維持前日看法，假如恒指3月份能守住10月線（13335）之上收市，應有一次短期反彈，反幅目標可能是13500-13600水平，所以現水平暫不會追沽恒指P輪，除非恒指確認跌穿13335，否則寧願等大市反彈至上述阻力位回頭時，才伺機追入恒指P輪，可選擇3605。讀者如果自問夠貼市及手腳快，亦可趁反彈短炒一注恒指C輪，但以上屬高難度動作。
趙飛雲