最近報紙報道話有染色毒杞子襲港，令人不快，中國假貨乜都有，不足為奇，冒牌貨假貨，如果限於軟件硬件名牌手袋衣服，雖然侵犯版權，值得懲罰，但唔會害死人，勉勉強強都算啦，但用化學原料做假食物，甚無人性，做假做到連中藥都撈埋，簡直埋沒良心，屬十惡不赦之列，值得槍斃。
發行德一年幾前已經警告左丁山唔好亂買杞子，佢話好多杞子都加咗顏色，食咗容易中毒。於是左丁山買杞子一定要去最老字號嗰間Ｅ記，重要買最貴嗰隻，諗住金漆招牌唔會賣衰嘢，食用可以放心。聽咗德哥警告之後，曾特登做咗一個實驗，去普通屋邨藥材舖買隻最平嘅杞子，放十粒落茶杯，用剛剛煲滾嘅滾水沖，浸十分鐘，貼上膠紙，稱之為Ａ杯。再用滾水沖十粒Ｅ記頂級杞子，稱為Ｂ杯。十分鐘後，A杯滾水接近棗紅色，Ｂ杯滾水都有紅色，但淡好多。杞子方面，Ａ杯嘅杞子比較細粒，Ｂ杯Ｅ記杞子有半粒花生咁大。
做過實驗，憑常識判斷梗係Ｅ記杞子冇咁多顏色，近乎自然生物多啲啩！所以直到𠵱家，只係喺Ｅ記買靚杞子，多謝德哥提醒。𠵱家睇到新聞話有毒杞子運港，就連Ｅ記杞子都先用滾水沖洗三分鐘，先至敢食用。
食杞子有乜好？上個月，財務Ｌ請去英記食火鍋，喺門口碰到知名電視人阿Ｃ姐，Ｃ姐滿頭銀髮，神色飽滿，臉容白裏透紅，保養得冇得彈。據電視台啲老友講，阿Ｃ姐每日用滾水沖十粒杞子，焗十幾分鐘，杞子連水吞服，十年如一日。杞子有明目補血降血糖之效，對身體有益，但又有人話，每日不可食杞子超過十粒喎。如果食到有阿Ｃ姐咁好面色，我都制。各位讀者如果另有食杞子妙方，請賜教。