香港電影金像獎頒獎禮已經曲終人散，但今屆頒獎禮是非多籮籮，噚日馮仁昭收到好多朋友打電話嚟，佢哋都投訴頒獎禮好悶蛋，搞到佢哋以為睇緊內地頒獎禮，因為大部份嘉賓上台都係講普通話，頒獎嘉賓同得獎者講嘢又冇火花，搞到個騷完全冇趣味！
頒獎禮重為遷就贊助商，夠膽死將傳統嘅紅地氈搞到變藍地氈。馮仁昭覺得大會點冇錢，都唔應該咁失大體。而文雋呢個金像獎主席，佢夠膽話金像獎係同無綫閂埋門嘅私人party。嘩！使唔使咁擦無綫鞋，講得呢啲蠢話嘅人，就知冇乜智慧同能力，如果香港影壇交畀呢啲人打骰，馮仁昭都替香港電影人難過。
另外，有線聽日會寫信畀民政事務局局長何志平、立法會議員霍震霆同工商及科技局局長曾俊華，希望佢哋回應吓，點解政府要畀二百萬資助文雋口中嘅私人party──香港電影金像獎。
胡杏兒噚日喺將軍澳電視廣播城為新劇《同撈同煲》拍攝宣傳片。
胡杏兒話早排去咗日本京都工作，咁啱嗰陣九州發生地震，佢話：「當時我哋喺京都拍緊嘢，之後睇新聞先知原來京都亦有三點幾級地震，但我就乜嘢感覺都冇。」
李逸朗同蔣雅文噚日到將軍澳出席活動。李逸朗日前自爆喺圈中有心儀對象，噚日佢再形容對方長髮眼大大，身材重係得得哋嗰種，喺香港生活唔係好耐。馮仁昭即時諗起2R嘅Race，雖然李逸朗否認，重話Race成個管家婆，但問佢鍾唔鍾意女友係管家婆時，佢又啞口無言，蔣雅文乘機笑李逸朗話：「你又話對我有好感。」搞到李逸朗好尷尬。
馬浚偉（馬仔）今個月頭同朋友坐郵輪去南亞地區度假，佢今次除咗識到一班唔同國籍嘅朋友外，重有豔遇㖭。話說馬仔成日喺露台同隔籬房嘅外籍女仔傾偈，佢對個女仔非常有好感，但當發覺對方原來高過自己一個頭後，馬仔即刻打退堂鼓，唔敢追求對方。馮仁昭覺得馬仔都幾保守喎！
天后李玟噚日喺台灣嘅電台宣傳最新唱片《Exposed》，講到碟入面有啲歌俾內地禁播，李玟話：「太不公平了。」
其中一首歌《SoGood》嘅內容，係李玟用男朋友嘅立場想像，希望女朋友做一啲嘢，問李玟喺現實生活中會唔會實現呢首歌所講嘅男友夢想，佢話：「秘密。」
噚日李玟重戴咗隻好閃嘅鑽戒，佢解釋係男友送嘅聖誕禮物，唔係訂婚戒指。
陳宇琛（石仔）噚日到將軍澳宣傳明珠台節目，佢重喺台上扮《功夫》入面嘅周星馳，舉動非常神似。
提到石仔嘅爸爸石修早排公開話想同囝囝一齊拍電視劇爭女，石仔都話好想試吓，雖然壓力一定好大，但相信自己都克服到！
