電影《魔戒》系列大導演彼得積遜（PeterJackson），佢另一部令影迷引頸以待嘅大製作《金剛》啱啱拍完，煞科戲係講述巨型金剛喺帝國大厦同一架戰機對戰，彼得重特別造咗架一九三三年嘅美軍戰機嚟拍攝，聽聞拍完後會將架機放喺博物館度展覽。
彼得拍完《魔戒》系列之後名利雙收，大把人爭住投資畀佢嚟重拍經典電影《金剛》，等佢達成童年夢想。新版嘅《金剛》耗資二億美元（約十五億六千萬港元），絕對係一級大製作，所以每樣嘢都一絲不苟。彼得為咗拍好嗰場金剛喺帝國大厦被一架戰機襲擊嘅煞科戲，特登搵專人整番架同三三年美國海軍專用戰機一樣嘅飛機嚟拍攝，真係製作認真！
熟識彼得嘅影迷都知佢鍾意搵埋幕後工作人員同朋友喺電影度客串，彼得為拍攝呢幕經典場面，搵咗正喺新西蘭放假嘅《魔戒》共同監製RickPorras，做戰機入面嘅槍手；機師就由以繪畫第一次世界大戰場面而馳名嘅畫家JamesDietz扮演。
雖然《金剛》已經拍完，但後期製作起碼要做到今年嘅十月，片中嘅金剛主要由電腦動畫嚟製作，不過彼得已製作咗個巨型嘅金剛頭，用嚟畀女主角娜奧美屈絲（NaomiWatts）對住做戲，等佢可以將感情發揮得好啲喎。