二五之爭，復活節停火，不過唔係冇事，而係暴風雨前的寧靜！
香港教區主教陳日君，突然前往廣東省活動！作為梵蒂岡布置在遠東嘅一名代理人，兼為新任特首當撈曾名義上嘅精神領袖，陳某今次北上，據特區愛國親中人士咬耳仔竊竊私語，有冇不可告人嘅目的，及別有用心嘅動機，實在好值得我壽爺黨中央密切注意！
特別係現時特區，對敵鬥爭極之複雜！台灣國民黨副主席江丙坤，亦同陳日君喺同日北上中國活動！陳某聲稱從事宗教行為，而江某呢？佢去到廣州，竟然走去敬拜黃花崗七十二烈士，同埋去到南京，重會拜祭國父嘅安息地「中山陵」㖭！
難怪特區愛國土共人士，對於呢兩股勢力，內心極為不滿！首先，陳日君勾結外國勢力，一貫反華反共，連民主派卿姐馬丁等，都冇回鄉證，冇理由陳日君就有！唔通有梵蒂岡認頭，就可以大搖大擺咁將個偉大祖國當做冇掩雞籠，自出自入？陳日君入去擺明係傳播聖經，與三自愛國教會搞對抗，有冇秘密收徒，都重未知，隨時搞顛覆活動，國家政策，點解有時竟然寬大到令人唔知佢搞邊科，無所適從？
至於台灣國民黨江丙坤，就更加囂張！參拜黃花崗七十二烈士墓及中山陵，其行動類似日本首相小泉純一郎參拜靖國神社，直頭係明目張膽，替經已被掃入歷史垃圾堆嘅「中華民國」公開招魂！有毛主席故居韶山佢唔去，有北京毛主席紀念堂佢唔送花圈，去埋呢啲性質極為反動落後嘅景點，即是公然搞兩個中國，容乜易下次連戰北上時，又去到中山陵，隨時擔支青天白日旗出嚟四圍舞，並高呼「中華民國萬歲」嘅反動口號？
加埋天主教徒兼肥彭親頒爵士嘅殖民地親信當撈曾都做埋特首，北角好多愛國老革命，一個個都呼天搶地，話現時嘅形勢好古怪，佢哋好唔理解！以前係黑，今日變咗白，咁樣發展落去，大家擔心，有朝一日，容乜易壽爺下令收回反英抗暴英雄楊光嘅「大紫荊」，並宣布為林彬、鄭大班、毓民三名廣播名嘴平反，並展開「深入揭批董建華思想運動」，並委任田少為運動委員會主席？若然有咁嘅一日，你說怎麼辦？八方固然𢱑晒頭，八方好多愛國愛咗成世嘅朋友，個個都𢱑頭，話早知係咁，不如好似煲呔咁，愛英國、愛梵蒂岡，原來咁先至會飛黃騰達！
傳真︰2623-9278
電郵︰[email protected]